Serbski program

13. winowca 2010, 12:34 hodź.

MDR KRAJNY SĆELAK SAKSKA wěnuje so w specielnych wusyłanjach a rubrikach tež w Sakskej bydlacym Serbam.

Serbski program we wusyłanjach MDR 1 RADIO SAKSKA

W MDR-studiju w Budyšinje je tež SERBSKI ROZHŁÓS zaměstnjeny. Z wjace hač 30 sobudźěłaćerjemi nałožuje Budyske studijo najwjace prócy w swojim programje, zo by so serbska rěč w zjawnosći nałožowała a zdźeržała. Wot załoženja sćelaka MDR 1992 je wone najwažniše regionalne studijo MDR 1 RADIJA SAKSKEJE a spěchuje serbsku rěč a kulturu cyłeho regiona. MDR – SERBSKI ROZHŁÓS wusyła tuchwilu 21,5 hodźinow tydźensce w hornjoserbskej rěči a přewza nimo toho hišće na tydźeń 6,5 hodźinow rozhłosoweho programa RBB w delnjoserbšćinje.

Wšědnje wusyła so z Budyskeho studija třihodźinski rańši program w serbskej rěči. Njedźelniši program SERBSKEHO ROZHŁOSA je jako program za cyłu swójbu natwarjeny a skića připosłucharjam mjez druhim specielne hudźbne wusyłanja, słuchohry, čitanja kaž tež dlěše reportaže k specielnym problemam narodnych mjeńšinow. Za młodźinu mjez 14 a 25, ale tež za wšitkich, kotřiž so młodźi čuja abo su młodźi wostali, wusyła stajnje póndźelu wot 20 do 22 hodź. Radijo SATKULA – młodźinske radijo SERBSKEHO ROZHŁOSA.

WUHLADKO - telewizijny magacin w serbskej rěči

Jónu měsačnje rěka sobotu 11:30 hodź. w MDR – telewiziji: „WUHLADKO“. W srjedźišću wusyłanja steji žiwjenje Serbow, jich tradicije, kultura a wšědne problemy. Redaktorojo pak pohladnu hdys a hdys tež do susodnych krajow. „WUHLADKO“ je połhodźinski hornjoserbski magacin wot Serbow za Serbow z aktualnymi přinoškami, hosćimi w studiju, ze stawiznami z Łužicy a mnohimi pokiwami na zarjadowanja. Magacin wusyła so w serbskej rěči z němskimi podtitulemi. WUHLADKO moderěruje Bogna Korjeńkowa.

Pěskowčik serbsce

Tež woblubowany „Pěskowčik“ móže so w telewiziji MDR kóždu njedźelu wječor w dwukanalowym systemje němsce a serbsce přijimować.