Aktualne nowostki Serbskeho rozhłosa Rańše powěsće: póndźelu, 06.02.2017


Za oratorij zwučowali

W šuli w Pančicach-Kukowje je so sobotu wotměła prěnja proba za lětuše předstajenje oratorija "Serbske jutry". Prapremjeru dožiwi wón w aprylu lěta 2013, składnostnje 150-lětneho wobstaća Towarstwa Cyrila a Metoda. Spisała bě teksty Chrysta Meškankowa, komponował je oratorij Jan Cyž. Lětsa předstaji so tróšku skrótšena wersija, kotruž je hudźbny nawoda Friedemann Bejma, zhromadnje z komponistom, wudźěłał. Předstajenje budźe 6. meje w Drježdźanskej katedrali a dźeń po tym w Budyskej tachantskej cyrkwi. Sobu spěwaja chóry Budyšin, Meja a Lilija kaž tež Delany, cyrkwinske chóry z Chrósćic, Njebjelčic a jednotliwcy z Wotrowskeho cyrkwinskeho chóra.


Festiwal bě wuspěšny

W Budyšinje je so kónc tydźenja zakónčił prěni hornjołužiski festiwal dźěćaceje hudźby, na kotrymž je so wot srjedy 30 wuměłcow z cyłeje Němskeje wobdźěliło. Cyłkownje 26 zarjadowanjow je so w Lubiju, Wojerecach, Běłej Wodźe a w Smochćicach wotměło. Jedne z tutych bě koncert „Dźěći spěwaja w třoch rěčach" štwórtk w Budyskim Serbskim šulskim a zetkawanskim centrumje, na kotrymž třo spěwotwórcy, zhromadnje z dźěćacym chórom Serbskeje zakładneje šule, němsce, serbsce a w gestikulaciskej rěči spěwachu. Wuhotowarjo prěnjeho festiwala dźěćaceje hudźby w Hornjej Łužicy su wosebje přechłapjeni wot angažementa nimale 400 sobuskutkowacych dźěći a zahoritosću něhdźe 2.750 wopytowarjow, kotřiž sebi bórzomne wospjetowanje tajkeho projekta za najmłódšich přeja.


Z busami k stawkej

Tež wučerjo z Hornjeje Łužicy hotuja so na zajutřiši stawk před sakskim financnym ministerstwom w Drježdźanach. Sakski zwjazk wučerjow organizuje za to busy, kiž do krajneje stolicy pojědu. Dźensa chcedźa staršich, kotrychž dźěći budu wot stawka potrjechene, konkretnje informować. Pozadk planowaneje akcije su tarifowe jednanja za zjawnostnu słužbu. Druhe koło bě zašłu wutoru zwrěšćiło. Dźěłarnistwa žadaja sej powyšenje mzdow za wučerjow wo šěsć procentow.


Premjera z premjeru

Za přichodnu serbsku inscenaciju NSLDź po titulom „Za brězami" wot Olivera Bukowskeho, wabi dźiwadło k prěnjemu razej z powabnym poskitkom za přihladowarstwo. Město jednoho předstajenja k potuńšenej płaćiznje poskića za „spěšnych zajacow" k pjeć předstajenjam potuńšene lisćiki. Tute hrabnjenčko dóstanu kupcy prěnich 60 lisćikow za kóžde z tutych inscenacijow w předpředani za sydom eurow. Premjera hry „Za brězami" budźe 11. měrca na hłownym jewišću a předstaja so po tym hišće pjeć razow hač do 6. meje.


Saněrowanje cyrkwje planowane

Wosadna rada we Łutach chce staru wjesnu cyrkej z 15. lětstotka lětsa wobšěrnje saněrować. Mjez druhim ma so nuznje wobnowić drjewjana konstrukcija třěchi. Wosadna rada wuchadźa z cyłkownych kóštow 200.000 eurow. Wjace hač 80 procentow pjenjez ma přińć ze spěchowanja a Leaderoweho programa za Łužisku jězorinu. Swójski podźěl chcedźa přez dary nazběrać. Za to planujetej so za meju beneficny koncert a za nazymu cyrkwinski swjedźeń.


Pücklerowe město pod lupu

Wosebita komisija pruwuje tuchwilu status Mužakowa jako lěkowanišćo (Kurort). W zašłych dnjach běchu posudźowarjo w měsće při němsko-pólskej hranicy, zo bychu sej tamniše turistiske kaž tež hojenske poskitki bliše wobhladali. Měšćanosta Andreas Bänder, kiž komisiju přewodźeše, praji nam po tym, zo je dobreje nadźije, zo Mužakow titul "Statnje připóznate lěkowanišćo" wobchowa. Wuslědk přepruwowanja so 5. meje wozjewi.

posledni raz aktualizowane: 06. małeho róžka 2017, 13:01 hodź.