Aktualne nowostki Serbskeho rozhłosa Rańše powěsće: srjedu, 08.02.2017


Wuspěšny ptači kwas ansambla

Lětuši jubilejny ptačokwasny program Serbskeho ludoweho ansambla so jara derje přiwza. Kaž rěčnik Štefan Cuška praji, běchu wšitke wustupy hač dotal pak jara derje wopytane abo wupředate. Poslednjej předstajeni wot jědnaće stej kónc tydźenja w Budyšinje, kotrejž stej nimale wupředatej. Ansambl móže jenož hišće jednotliwe zastupne lisćiki poskićić. Hinak hač loni njebudźe so ptačokwasny program jutry wospjetować.


So po serbskich firmach a kubłanišćach rozhladowali

We wjacorych serbskich firmach a kubłanišćach je so wčera dopołdnja 8. lětnik Worklečanskeje serbskeje wyšeje šule "Michał Hórnik" rozhladował. Tak wopytachu jednotliwi šulerjo w Miłoćicach Wjenkec metalotwarsku firmu, w Pančicach-Kukowje skótnolěkarsku praksu, Zelnakec pjekarnju a dźěłarnju za zbrašenych "Swjateho Michała". We Worklecach šijachu pola šwalče Petry Kupcyneje, pomhachu kubłarkam při hladanju dźěći w tamnišej pěstowarni a přewodźachu sobudźěłaćerjow Maltezow při wšědnym dźěle. Projekt powołanskeje orientacije jako zhromadne předewzaće Worklečanskeho kubłanišća a Rěčneho centruma Witaj je so mjeztym třeće lěto zasobu přewjedł. Dotal je wjace hač 70 serbskich holcow a hólcow přewažnje serbske rjemjeslniske zawody, firmy, kubłanišća a zarjady bliže zeznało.


Dołhodobnje problemy rozrisać w Njeswačidle

Njeswačanscy gmejnscy radźićeljo su na swojim wčerawšim posedźenju nowe wustawki wohnjoweje wobory schwalili. Při nastajenju tutych złožowaše so gmejnski zarjad mjez druhim na mustrowe wustawki susodnych woborow. Nimo toho wobjednawachu problemy při wuporjedźenju nadróžneho wobswětlenja. Zwjeršnje wuwjedźene reparatury dawnych lět wjedu dźeń a bóle k tomu, zo wobswětlenje wupadnje. Trěbne aktualne reparatury su zdźěla komplikowane a jenož nachwilne wolóženje. Kaž wjesnjanosta Gerd Šuster zdźěli, ma so gmejna w přichodnych lětach zasadnje tomu wěnować, wjesne wobswětlenje w trěbnej měrje zawěsćić.


Slepo chce 220.000 eurow zalutować

Gmejna Slepo chce hač do lěta 2020 na 220.000 eurow zalutować. K tomu bu na wčerawšim gmejnskim posedźenju wotpowědny strukturny koncept wobzamknjeny. Wosebje zalutować chcedźa wudawki w zarjadnistwje, ale tež někotre dawki so zwyša. Dale bu hospodarski plan za přichodnej dwě lěće schwaleny. Najwažniše projekty su twar Němsko-serbskeho šulskeho centruma, wuhotowanje gmejnskeje wohnjoweje wobory a wutwar spěšneho interneta.


Kriterije wurisanja za serbske gmejny w syći

Štóž chce so wo wurisanju "Rěčam přichilena komuna" bliže informować, ma wot nětka w syći składnosć k tomu. Kriterije wubědźowanja su mjenujcy na internetowej stronje třěšneho zwjazka wozjewjene. Kaž praji předsyda Domowiny, Dawid Statnik, nadźijeja so na bohate wobdźělenje městow a gmejnow w serbskim sydlenskim rumje a na to, zo nabywa serbšćina we wšědnym žiwjenju wjace kedźbnosće a prezency. Hač do kónca lěta móža gmejny swoje koncepty k spěchowanju serbskeho žiwjenja zapodać. Klětu w februarje so dobyćerjo mytuja.

posledni raz aktualizowane: 08. małeho róžka 2017, 09:29 hodź.