Rańše powěsće: póndźelu, 13.03.2017


Ličba šulerjow na wyšich šulach konstantna

Na serbskich a dwurěčnych wyšich šulach w Hornjej Łužicy je so za přichodne pjate lětniki dohromady 215 šulerjow přizjewiło. To je nimale samsna ličba kaž loni. Najwjace změja po ličbach Sakskeje kubłanskeje agentury w Kulowje ze 56 šulerjemi. W Ralbicach maja 27 přizjewjenjow, we Worklecach 31 a w Radworju 33. Na Budyskej Serbskej wyšej šuli je so za nowy pjaty lětnik 28 šulerjow přizjewiło, w Slepom je jich 40.


Jutrowne wiki w Budyšinje

Spěchowanski kruh za serbsku ludowu kulturu je z wothłosom lětušich jutrownych wikow w Budyskim Serbskim domje přewšo spokojom. Dohromady naličichu 2.500 wopytowarjow. Zajimcy mějachu sobotu a wčera móžnosć, 32 wustajerjam a wustajerkam při debjenju jejkow přez ramjo hladać. Běchu to mjeztym hižo 26. jutrowne wiki.


Dalše dźěła za kružny wobchad

W Budyšinje twarja wot tuteho tydźenja dale při kružnym wobchadźe na křižowanišću Drježdźanskeje a Schliebenoweje. Dźensa a jutře tam po zymskej přestawce twarnišćo přihotuja, wot srjedy so potom wobchad z amplu rjaduje. Do směra Sprjewineje kupjele budźe Drježdźanska zaso někotre tydźenje zawrjena. Srjedź junija ma kružny wobchad dotwarjeny być.


Sorabija Lipsk pyta spěchowarjow

Serbske studentske towarstwo Sorabija Lipsk pyta dale spěchowanskich čłonow. Kaž praji předsydka Franciska Grajcarekec, maja dotal jenož jeničku wosobu, kiž towarstwo prawidłownje spěchuje. Na swojim jubilejnym zarjadowanju k 300-lětnej róčnicy loni w decembrje běchu studenća prěni króć za to wabili. Spěchowanscy čłonojo móhli při tym pomhać, dołhodobne skutkowanje towarstwa zaručić a serbske swjedźenje w Lipsku financielnje podpěrować.


Dźeń wotewrjenych hornčernjow

Na dnju wotewrjenych hornčernjow su so kónc tydźenja tež hornjołužiscy hornčerscy mištrojo a keramikarjo wobdźělili. Tak móžachu zajimcy so mjez druhim we Wěteńcy, Porchowje, Halštrowje a Bóšicach na městnje informować a fachowcam přez ramjo pohladać. Tu a tam mějachu tež wosebite poskitki za dźěći spřihotowane. Dźeń wotewrjenych hornčernjow bě po cyłej Němskej mjeztym 12. króć. W Hornjej Łužicy je so lětsa wjace hač 20 hornčernjow wobdźěliło.

posledni raz aktualizowane: 13. nalětnika 2017, 10:44 hodź.