Rańše powěsće: póndźelu, 20.03.2017


Wobory zhromadnje nakupuja

Gmejna Ralbicy-Róžant je w zašłych dźesać lětach na 450.000 eurow za wohnjowu woboru wudała. To zdźěli zastupowacy wjesnjanosta Michał Šołta na zašłym posedźenju gmejnskeje rady. Klětu chce sej gmejna hišće nowe awto za swoju woboru kupić. W přichodźe pak měli so gmejny Zarjadniskeho zwjazka "Při Klóšterskej wodźe" dale prócować, techniku zhromadnje nakupować, tak Šołta. Z tym hodźeli so pjenjezy lutować. Z kooperaciju mjez Chrósćicami a delanskej gmejnu bě so to lětsa hižo radźiło.


Młody Radworski pozawnist dobył

Při krajnym wubědźowanju "Młodźina hudźi" w Sakskej zdoby sej sobotu w Budyskim Schillerowym gymnaziju Radworčan Dawid Wowčer 1. městno w skupinje pozawnistow hrajo z Markusom Krancherom a Samuelom Bilkom. Woni dóstachu 24 wot 25 móžnych dypkow. Dobyćerjo smědźa so nětko na cyłoněmskej runinje dale wubědźować.


Slěborny jězor zaso wěsty?

Tež lětsa hodźi so Slěborny jězor we Łazowskej gmejnje zaso nachwilnje wužiwać. Dowolnosć płaći wot 15. apryla. Kaž hižo w zašłych lětach je krajnoradny zarjad w Budyšinje gmejnje dowolił, zo smě so w jězoru kupać, runje tak kaž nurić bjez techniskich nastrojow. Z čołmami pak njesmě so přeco hišće po jězorje jězdźić. W zašłych lětach bě Slěborny jězor dospołnje zawrjeny, dokelž njebě jasne, hač so jeho přibrjohi do wody njesunu.


Jutry w Serbskim muzeju w Budyšinje

Budyski Serbski muzej je kónc tydźenja swój rjad dojutrownych zarjadowanjow zahajił. Sobotu a wčera debjachu třo ludowi wuměłcy jutrowne jejka a předstajichu technice wóskowanja a bosěrowanja. K tomu wotmě so mała dźěłarnička. Wšo hromadźe je wjac hač 150 zajimcow přišło, wosebje němscy hosćo a wjacori wukrajnicy. Přichodny kónc tydźenja změje Serbski muzej podobny poskitk.


Kubłanske dny w Schmiedebergu zaso atraktiwniše

Młodostni ze wšěch serbskich katolskich wosadow su so wčera nawječor z kubłanskich dnjow ze Schmiedeberga nawróćili. Wot pjatka běchu so woni w přednoškach a dźěłowych skupinach z temu "Mój puć do njebjes" rozestajeli. Kaž referentka za młodźinu, Lucija Škodźina, praji, je so na třidnjowskim zetkanju 40 młodostnych wobdźěliło - telko kaž hižo dawno nic. K tomu je tež nowy termin w póstnym času přinošował. Hewak wotměwachu so kubłanske dny stajnje prěni kónc tydźenja januara.


Łužiski duel w kopańcy

We łužiskim duelu regionalneje ligi je Budissa Budyšin wčera Energiji Choćebuz jasnje z 0:4 podležała. Hižo po dźewjeć mjeńšinach nawjedowachu Choćebuženjo 2:0. W druhim połčasu dyrbješe so hra štwórć hodźiny přetorhnyć, jako mjetachu Choćebuscy přiwisnicy praskotaki na hrajnišćo. Po wčerawšej poražce hrozy Budyšanam chutny strach zestupa z regionalneje ligi. Běše to prěni raz, zo so na Budyskej Młynkec łuce dwě łužiskej koparskej mustwje štwórteje najwyšeje ligi Němskeje zetkaštej. Duel je na 1900 ludźi widźało.

posledni raz aktualizowane: 20. nalětnika 2017, 10:00 hodź.