Rańše powěsće: wutoru, 11.04.2017


Serbscy młodostni w Albanskej

Štyrjo serbscy młodostni towarstwa PAWK su sebi na tydźeń do albanskeho Golema dojěli. Tam wobdźěla so na jutrownym seminarje MENS - młodźiny europskich narodnych skupin. Přeprosyli su młodych zastupjerjow europskich mjeńšinowych organizacijow Vlachojo z Albanskeje, kotřiž wuhotuja pod hesłom "twarjenje mostow" tydźenski seminar. Hač do pjatka diskutuja problemy a straty albanskich Vlachow kaž tež planowany přistup Albanskeje k EU. Při tym nawjazaja tež nowe styki k druhim europskim mjeńšinam.


Biskop wopyta křižerje a swjeći wutoru dźaknu božu mšu

Drježdźansko-Mišnjanski biskop Heinrich Timmerevers chce jutrowničku serbskich křižerjow wopytać. Kaž rěčnik biskopstwa wčera popołdnju zdźěli, chce wón mjez druhim w Radworju tež Budyskich a Baćonskich přiwitać. Nowe je, zo biskop lětsa tež dźaknu božu mšu serbskich křižerjow wutoru po jutrach w Róžeńće swjeći.


Telko kaž hišće ženje na Olympiadźe serbskeje rěče

Na lětušu Olympiadu serbskeje rěče bu 46 hornjoserbskich šulerjow delegowanych. Kaž praji nam Marlis Młynkowa wot Serbskeho šulskeho towarstwa, je tež 25 šulerjow z Delnjeje Łužicy pódla. To je telko kaž hišće ženje. Wubědźowanje za šulerjow šestych lětnikow z wyšich šulow Hornjeje a Delnjeje Łužicy kaž tež z gymnazija wotměje so kónc apryla we Wodowych Hendrichecach.


Schadźowanka dale w Krónje

Přichodnej dwě serbskej Schadźowance budźetej na kóždy pad hišće w Budyskej Krónje. Za njej ma Załožba za serbski lud za lětsa a klětu hišće płaćiwe zrěčenje. Kaž Jana Pětrowa wot Załožby za serbski lud zdźěli, njewobsteji žadyn strach, zo móhło so zrěčenje cofnyć. Přichod Schadźowanki zdaše so njejasny być, dokelž je "Króna" jako měšćanska hala tuchwilu na předań. Jeje dalši přichod pak je tuchwilu dospołnje njejasny. Lětuša Schadźowanka wotměje so 25. nowembra.


Jednota Kamjenc chce do wyšeje ligi postupić

Krajny koparski ligist Jednota Kamjenc chce lětsa móžnosć wužić a do wyšeje ligi postupić. Jednaćel Frank Terks je próstwu wo postup dypkownje wotedał. W zašłymaj lětomaj su so w Kamjencu postupa wzdali, byrnjež postupić směli. To měješe financielne přičiny. Dźewjeć hrow do kónca sezony steji mustwo trenarja Franka Ričela w tabulce tuchwilu na druhim městnje. W cyłku hrajetaj tež koparjej Serbskeje koparskeje wubranki Patrick Woko ze Šunowa a Feliks Hrjehor ze Serbskich Pazlic.

posledni raz aktualizowane: 11. jutrownika 2017, 09:30 hodź.