Rańše powěsće: štwórtk, 13.04.2017


Wjeršk cyrkwinskeho lěta

Tež w serbskich wosadach spominaja dźensa wječor z kemšemi na poslednju wječer Jězusa ze swojimi wučomnikami. Z tym započnu so za křesćanow po cyłym swěće tři najwažniše dny cyrkwinskeho lěta. Po kemšach so wołtarnišća wurumuja. Do toho přenjese so Najswjećiše na pobočny wołtar. Hižo wčera wječor su wěriwi Chróščanskeje wosady do swojeje farskeje wsy putnikowali. Po kěrchowje kročachu křižowy puć, spominajo na swojich zemrětych. W Patokec kładźitej bróžni na Horach zetkaja so dźensa ewangelscy wěriwi Wojerowskeje wosady na dwurěčnu nutrnosć.


Dalša Krabatowa atrakcija w Čornym Chołmcu

Při Krabatowym młynje w Čornym Chołmcu wotewri so dźensa "Dom Jurja Brězana". To zdźěli předsyda tamnišeho Krabatoweho towarstwa, Tobias Čižik. Wot spočatka lěta 2015 je so při Krabatowym młynje pod pomnikoškitom stejacy tykowany dom znowa natwarił. Wón bu do toho w Dubrjeńku wottwarjeny. W nim pokazaja serbske nałožki, rjemjesło a přehladku Wojerowskeje narodneje drasty. W přichodźe chcedźa tam tež na zarjadowanja a seminary z dźěćimi a młodostnymi přeprosyć.


Na Chróšćanskim kěrchowje plestrowali

Twarske dźěła na Chróšćanskim kěrchowje su nimale zakónčene. Kaž farar Měrćin Deleńk informuje, su dokoławokoło kěrchowa wšitke pućiki doplestrowane, tak zo móžeja křižerjo njedźelu po nich jěchać. Nětko ma so hišće pućik wot fary k cyrkwi přeplestrować, zo móhli tež wobydlerjo starownje z rolatorom a chorobnym stołom lěpje po nim jězdźić. Hižo za čas skutkowanja fararja Hrjehorja běchu w Chrósćicach započeli, kěrchow do porjadka přinjesć. Tehdy bě so dźěl murje sypnył a z tym dźěle pućika wobškodźił.


Skupina "Silbermond" w Budyskej šuli

Po cyłej Němskej popularna skupina Silbermond je wčera w Budyskej Strowotnej studni zhromadnje ze šulerjemi tamnišeje wyšeje šule hudźiła. Naležnosć młodych hudźbnikow bě, wšitkich šulerjow narěčeć - domjacych runje tak kaž dźěći ćěkancow. Z podobnym projektom je skupina tež hižo w druhich šulach Sakskeje wustupiła. Hudźbnicy skupiny Silbermond pochadźeja wšitcy z Budyskeje wokoliny.


Prěni łužiski orchester měchawow załoženy

W Zemichowje w Hodźijskej gmejnje bu nowe dudowe towarstwo z mjenom "1. łužiski orchester měchawow" wutworjene. Wone chce hudźbu z dudami pěstować a wosebje wo kozole, měchawje a měchawce informować. Bórze chcedźa čłonojo tež wučbne hodźiny podawać a w młodźinje zajim za instrument zbudźić. Předsyda towarstwa je Jens Güntzel ze Zemichowa, jeho naměstnik je spěwar Serbskeho ludoweho ansambla Andreas Henčl z Pančic-Kukowa.


W domje Zejlerja a Smolerja we Łaz wšo ponowjene

Dom Zejlerja a Smolerja we Łazu je trajnu wustajeńcu wo stawiznach domizny ponowił. To běše trjeba, dokelž su w minjenych lětach stajnje nowe eksponaty přiwzali, zdźěli spěchowanske towarstwo. Z noworjadowanjom su so tež tafle wustajeńcy ponowili. Nimo toho móžachu z pomocu spěchowanskich pjenjez dwě witrinje, tři podesty a ćišć nowych flyerow zapłaćić.

posledni raz aktualizowane: 13. jutrownika 2017, 09:44 hodź.