Rańše powěsće: srjedu, 19.04.2017


Sta křižerjow w Róžeńće

W Róžeńće su wčera wječor zaso stotki wěriwych ze wšěch serbskich katolskich wosadow dźakne kemše lětušich křižerjow swjećili. Hłowny celebrant běše Ralbičanski farar Sćěpan Delan. Prědował je Radworski farar Beno Jakubaš, kiž młodych křižerjow naležnje do duchownych powołanjow namołwješe. Na kóncu Božeje słužby je hišće biskop Heinrich Timmerevers křižerjow postrowił. Serbski rozhłós je kemše w radiju a interneće wusyłał.


Hudźba je barba po notach

Na chórowych dnjach za dźěći wobdźěli so tuchwilu 80 šulerjow w domje biskopa Bena w Smochćicach. Pod hesłom "Hudźba je barba po notach" zaběraja so dźěći ze spěwami a wěru. Při tym nazwučuja nowe a stare spěwy, kotrež chcedźa sobotu na koncerće w Zhorjelcu předstajić. Drježdźansko-Mišnjanske a Zhorjelske biskopstwo chórowe dny za dźěći dwójce wob lěto wuhotujetej, přichodny raz w nazymskich prózdninach.


Bjez miliny byli

Póndźelu wječor je w Delanach wokoło Ralbic we wobkruhu někak šěsć kilometrow milina wupadnyła. Kaž rěčnica ENSO nam wčera zdźěli, potrjecheše to někak 1.500 kupcow. Přičina bě wobškodźeny zemski kabel mjez Róžantom a Smjerdźacej. Reparatura so dźensa wotzamknje a přechodny staw zastaranja so zaso zběhnje.


Chcedźa znowa bul kopać

FUEN, Federalistiska unija europskich narodnych skupin, je dotalnym wobdźělnikam móžne terminy za štwórte europske koparske mišterstwa narodnych mjeńšin, kotrež budu w lěće 2020, wozjewił. Požadarjej, Korutanscy Słowjeńcy z Awstriskeje a zwjazk štyrjoch namjeznych narodnych mjeńšinow wokoło Flensburga, namjetuja Europeadu znowa w juniju abo spočatk julija přewjesć. We Łužicy pak započnje so na regionalnej runinje kopańcy w tutym času přihotowanska faza a na wokrjesnej runinje přewjedu so hišće winowatostne dypkowe a pokalne hry.


Kedźbu na dróhach!

Policija přewjedźe dźensa we wjacorych zwjazkowych krajach zaso cyłodnjowsku akciju, při kotrejž zastojnicy spěšnosć awtow kontroluja. Tež w Sakskej wot dźensnišeho do jutřišeho ranja na tójšto městnach błyskaja. Kaž policija wčera zdźěli, budźe jedne ćežišćo Porchowska hora na A 4. Ale tež před šulemi měli šoferojo wosebje na wobmjezowanje spěšnosće dźiwać. Na dohromady 50 wšelakich městnach změja w Budyskim a Zhorjelskim wokrjesu měrjenske aparaty nastajene.

posledni raz aktualizowane: 19. jutrownika 2017, 09:35 hodź.