Rańše powěsće: srjedu, 10.05.2017


Wobchod w Róžeńće ma nowu wobsedźerku

Nowa wobsedźerka serbskeho drastoweho wobchoda w Róžeńće budźe Erika Maiwaldowa ze Šunowa. Wona jón 4. oktobra znowa wotewri. To praji wčera Marija Hrjehorjowa, kotraž kónc junija wobchod za narodne drasty zawrěje. Wšitke dobropisy płaća jenož hišće hač do toho časa. W zašłym běrtl lětstotku móžachu kupcy nimo serbskeje drasty w Róžeńće tež serbske knihi kupować a kwasne blida skazać.


Zo bychu handyje tež serbsce rěčeli

Rěčny institut z Finskeje pyta Serbow, kotřiž měli wosebity digitalny projekt přewodźeć. Institut je specializowany na rěč spóznawanske systemy za kompjuter a mobilne nastroje, a pyta nětko ludźi, kotřiž wuběrane hornjoserbske słowa do gramatiskich kategorijow zarjaduja. Přidźěłać móže kóždy doma přez internet, kiž hornjoserbšćinu a jendźelšćinu wobknježi. Zajimcy móhli so na přikład pola Juliana Nyče přizjewić, kiž projekt podpěruje. Tež na facebookowej stronje MDR Serbja wo tym informujemy. Institut w Finskej je wotnožka ameriskeho zawoda Lionbridge Technologies, kiž daty potom dale wobdźěła.


Žadaja sej planowansku wěstotu wot LEAG

Slepjanska gmejna sej žada, zo so rozsud zawoda LEAG wokoło Wochožanskeje jamy tež prawnisce zawěsći. To je za planowansku wěstotu w gmejnje trěbne. Kónc měrca je zawod rozsudźił, zo Wochožansku jamu w poprawom planowanej wulkosći njerozšěri. Tohodla njetrjeba so tež telko ludźi přesydlić. Nětko maja w gmejnje wjacore prašenja rozrisać, kotrež wosebje inwesticije nastupaja, zo bychu přiměrili dotal wohrožene wjesne dźěle na niwow cyłeje gmejny. Tute prašenja chcedźa na přichodnych zetkanjach ze Sakskim krajnym knježerstwom, zawodom LEAG a Domowinu wobjednawać, kaž wčera na posedźenju gmejnskeje rady prajichu.


Dźěći hraja dźiwadło

Za lětuše dny serbskeho dźěćaceho dźiwadła je 60 dźěći přizjewjenych. Kaž Załožba za serbski lud informuje - wona tute dny zhromadnje z Rěčnym centrumom WITAJ organizuje - su dźěći ze Serbskeju zakładneju šulow z Ralbic a Radworja runje tak pódla kaž ze Žylowskeho a Borkowskeho horta. W dźěłarničkach chcedźa wone dźiwadźelić, improwizować a so pohibować. Tute nawjeduja serbscy fachowcy. Lětuše 22. Serbske dźiwadłowe dny za dźěći wotměja so 18. a 19. meje w Budyšinje.


Ze saksofonom po cyłej Němskej

Serbski saksofonist a DJ Daniel Matka, tež znaty jako Madstep, informuje na facebooku wo swojej lětušej hudźbnej turje. Wot meje hač do awgusta wustupi wón na nimale 20 festiwalach a wjetšich zarjadowanjach - mjez druhim w Lipsku, Freibergu a Braunschweigu. W Chrósćicach wustupi rodźeny Lejnjan na lětušim folklornym festiwalu ze swojej hudźbnej skupinu. Mjeztym ma Daniel Matka zrěčenje z profesionelnym managementom a je tež hižo prěni swójski spěw na YouTube wozjewił.


Kulowčenjo we Wojerecach

Na projektowym dopołdnju 4. lětnika Kulowskeje zakładneje šule "Krabat" zhonichu šulerjo wčera wo Domowinje, wo jeje župje "Handrij Zejler" a wo dźěćacym časopisu "Płomjo". Wjeselo wubudźi tež Bena Budarjowa słuchokniha "Cowboy Tom abo dyrdomdej ze zaka". Šulerjo předstajichu swójske basnje wo nalěću, kwětkach, nałožkach a wo přirodźe. Ze zhromadnym spěwanjom serbskich ludowych spěwow dopołdnjo we Wojerowskim Domowinskim domje wuklinča.

posledni raz aktualizowane: 10. róžownika 2017, 08:28 hodź.