Rańše powěsće: srjedu, 17.05.2017


Serbja na kongresu FUEN w Rumunskej

Dźensa poda so delegacija Serbow na kongres europskeje mjeńšinoweje organizacije FUEN do Rumunskeje. W měsće Cluj-Napoca chce FUEN mjez druhim zahajić zběranje jedneho miliona podpismow za iniciatiwu za mnohotu w Europje, Minority SafePack. Nimo toho rozsudźa, štó wuhotuje Europeadu 2020. Serbsku delegaciju nawjeduje předsyda Domowiny, Dawid Statnik. Wón přednošuje na kongresu tež wo digitalizaciji serbskeje rěče.


Serbski ludowy ansambl změje zaso intendanta

Serbski ludowy ansambl dóstanje zaso intendanta jako wuměłskeho nawodu. Městno so wupisa, wo nim so hišće lětsa rozsudźi a ma so k hrajnej dobje 2018/19 wobsadźić. To rozsudźi wčera Rada Załožby za serbski lud w Podstupimje. Zrěčenje z dotalnej jednaćelku Dianu Wagnerec bu wo pjeć lět podlěšene. Wona budźe přichodnje překupstwowa jednaćelka poboku intendanta. Dale je Rada Załožby pozitiwnu kónčnu rozprawu wědomostneje rady wo přesadźenju doporučenjow za Serbski institut na wědomje wzała. Za institut ma so pruwować, kak móhło so dotalne twarjenje saněrować a rozšěrić - abo nowe stejnišćo namakać a što by to płaćiło.


Fonds za kulturnu wuměnu je wučerpany

Na swoje prěnje posedźenje po 18. hłownej zhromadźiznje je so prezidij Domowiny wčera we Wojerecach zetkał. Dźěše wo přihoty přichodneho posedźenja Zwjazkoweho předsydstwa Domowiny spočatk junija. Dale zaběraše so prezidij z namjetami za delegowanja a kulturne wuměny. Tak podpěruja lětsa mjez druhim kulturnu wuměnu młodostnych Sinti a Roma ze Serbami, wobdźělenje TCM na konferency Europassion w Madźarskej a wustup chóra Delany na Dnju Saksow w Lubiju. Lětuši fonds za kulturnu wuměnu a delegowanja je z tym wučerpany. Požadanja su hakle zaso za klětu móžno.


Łaz stara so wo zakładnu šulu a wopłóčki

Łazowska gmejna chce lětsa 5,6 milionow eurow inwestować. Štyri miliony so spěchuja. Najwjetši projekt je dalše ponowjenje zakładneje šule "Při Hórnikečanskim jězorje" we Wulkich Zdźarach, hdźež chcedźa awlu wutwarić a fasadu sportownje ponowić. Dale chcedźa wopłóčki we Wulkich Zdźarach a Koblicach rjadować. W Běłym Chołmcu ma so wobswětlenje na wsy ponowić. Wčera su na posedźenju gmejnskeje rady swój lětuši hospodarski plan wobzamknyli.


K festiwalej palenc

Za folklorny festiwal "Łužica" kónc junija su wosebity festiwalny palenc skazali. Budźetaj to zelowy a sadowy palenc, tak Clemens Škoda wot přihotowanskeho wuběrka. Dale wobrěčachu wčera logistiku dokoławokoło skupinow a tež system po wsy rozdźělenych kasow. Tutón je so w zašłych lětach jako dobry wopokazał. Wšo dohromady je staw přihotow dobry a přeńdźe nětko do intensiwneje fazy, tak Škoda.


Jubilejna kołojězba w Ramnowje

Za kołojězbu wokoło Ramnowskeho hrodu je so lětsa wjace hač połsta zapřahow přizjewiło, tak zarjadowar Andreas Mikus. Mjez pohončami je tež tójšto serbskich, štož zarjadowarja wosebje wjeseli. Nimo toho přijědu do Ramnowa samo zapřahi z Rudnych Horin a Durinskeje. Lětuša 20. kołojězba přichodnu njedźelu powjedźe do Biskopic, kiž swjeći lětsa 790. wobstaće. Najrjeńše zapřahi so njedźelu před kulisu Ramnowskeho hrodu mytuja.

posledni raz aktualizowane: 17. róžownika 2017, 08:43 hodź.