Rańše powěsće: štwórtk, 18.05.2017


Dróha a wobswětlenje w Rakecach matej so ponowić

Dróha a wobswětlenje w přemysłowej přestrjeni w Rakecach matej so ponowić. Planowanskim dźěłam su gmejnscy radźićeljo wčera přihłosowali. To potrjechi tež dróhu w Psowjach. Nimo toho přewozmje Rakečanska gmejna wjerćaty rěbl Biskopičanskeje wohnjoweje wobory. Na wčerawšim posedźenju gmejnskeje rady bu Jürgen Schwurack počesćeny, kotryž je 37 lět dołho wjesnu wohnjowu woboru w Jeńšecach (němsce: Johnsdorf) nawjedował.


Dróha přez Pančicy nětko zawrjena

Wot wčerawšeho je dróha S 100 přez Pančicy-Kukow nětko po wjacorych přesuwanjach termina začinjena. Přičina je dospołny wutwar wotrězka a ponowjenje mosta přez Klóštersku wodu. Spočatk twarjenja bě so přesunył, dokelž dyrbjachu w přihotach na twarnišćo we wobšěrnym dźěle wšě medije přepołožić, kaž milinu, wobswětlenje, płun a telekomunikaciju. Wobjězdy powjedu šoferow zwjetša zwonka wsy nimo twarnišća. Po dotalnym planje maja dźěła hač do klětušeho lěća trać.


Kupanska sezona so pomału započnje

Při Bjerwałdskim jězorje su wčera kupansku sezonu zahajili. Woda ma tuchwilu 15 stopnjow. Tež na Lejnjanskim jězorje je hižo wodosport móžny, temperatura wody je tam samsna. Kupjele w dwurěčnych kónčinach pak njejsu hišće wotewrjene. To wotwisuje wot wjedra, praji kupanski mištr Porchowskeje kupjele, Bernd Nowak. Wot kónca tydźenja změja tam wšitko spřihotowane. W Budyskej Sprjewinej kupjeli nochcedźa so aktualnje wuprajić, hdy swoju kupjel wotewrja, dokelž čakaja hišće na wobstajne wjedro.


Přidatny trawnik za sportowu jednotku Chrósćicy

Sportowa jednotka Chrósćicy wutwari runje areal něhdyšeho twjerdeho hrajnišća južnje hłowneho trawnika. Za 50.000 € zruna so płonina, prjedy hač so nowy trawnik wusyje, wrota nastaja a saki wokoło hrajnišća zestaja. Mjeńše sportnišćo ma so potom za trening a hry dorosta wužiwać. Hač do kónca junija maja dźěła zakónčene być.


Krawčik wopušći FC Hornju Łužicu

Regionalny koparski ligist FC Hornja Łužica Neugersdorf njebudźe zrěčenja z pjeć hrajerjemi podlěšić. Mjez nimi je tež Njebjelčan Jonas Krawčik, hrajer serbskeje koparskeje wubranki. Přičiny w nowinarskej zdźělence žane njemjenuja. 20-lětny Krawčik bě před dwěmaj lětomaj wot Dynama Drježdźany do Neugersdorfa přišoł a bu wosebje w prěnim lěće husćišo zasadźeny. W aktualnej hrajnej dobje, kotraž so sobotu zakónči, hraješe pak wón jenož hišće trójce. Hdźe Jonas Krawčik w přichodnej sezonje hraje, njeje hišće jasne.

posledni raz aktualizowane: 18. róžownika 2017, 10:01 hodź.