Rańše powěsće: póndźelu, 31.07.2017


Přihoty na nowe šulske lěto

Dźensa zahaji so na šulach w Sakskej přihotowanski tydźeń. Wučerjo přihotuja nětko wučbne materialije za nowe šulske lěto. Nimo toho kubłanska agentura tutón tydźeń doskónčnje wo přistajenju nowych wučerjow rozsudźi. Je to posledni prózdninski tydźeń w Sakskej. Sobotu witaja na zakładnych šulach šulskich nowačkow - přichodnu póndźelu so potom nowe šulske lěto za wšěch šulerjow zahaji.


Synchronizuja nowy film

Rěčny centrum WITAJ a Sakski wukubłanski a wupruwowanski kanal SAEK započnjetaj dźensa nowy film za serbske dźěći synchronizować. Rěka "Syn Winnetouwa", original je němskorěčna produkcija. W srjedźišću steji hólc, kiž ma sej ćežko w rjadowni a chce na jewišću syna indianskeho włodyki hrać. Teksty přełožiła je Rejzka Delenkowa. Film trjeba znajmjeńša 20 rěčnikow - dźěći a dorosćenych. Dalši zajimcy za róle móža so pola RCW přizjewić, hišće rěčnikow pytaja. "Syn Winnetouwa" je dźewjaty dźěćacy kinowy film, kotryž so do serbšćiny synchronizuje. Wón ma klětu wuńć.


Na kursu čěšćiny w Praze

Na Karlowej uniwersiće w Praze bu kónc tydźenja lětuša 61. lěćna šula słowjanskich studijow zahajena. Mjez nimale 150 wobdźělnikami z 38 krajow su tež tři Serbowki. Wopytaja štyritydźenski intensiwny kurs čěšćiny. Cil je, zo swoje rěčne zamóžnosće w čěšćinje wukmanjeja a so z čěskej kulturu a čěskimi stawiznami zeznajomja. Stipendije za lěćnu šulu spožča kóžde lěto čěske knježerstwo.


Wjesne swjedźenje a sportowanje

Kónc tydźenja su we wjacorych serbskich wsach swjećili. Wjesny swjedźeń mějachu w Serbskich Pazlicach a Koćinje. W Smjerdźaćej je wjesna wohnjowa wobora swój 60-lětny jubilej załoženja swjećiła. Nimo zabawneho programa skićachu wšudźe tež sportowe wubědźowanja. W Smjerdźacej su hosćićeljo wubědźowanje wobornikow dobyli. Na koparskim turněrje w Serbskich Pazlicach wobsadźichu Pěskečenjo prěnje městno.


Zazběh sezony z derbyjom

Koparske mustwo FC Hornja Łužica Neugersdorf je wčera na prěnim hrajnym dnju regionalneje ligi sewjerowuchod koparski derby přećiwo Budissy Budyšin z 3:0 dobyło. Wrota třělichu w prěnim połčasu Josef Marek a Stephan Vachoušek, w druhim Dennis Blaser. Pódla běštaj tež koparjej Serbskeje koparskeje wubranki: za Neugersdorf Karl Petrik a pola Budissy Jonas Krawčik. Wobaj staj cyłu hru absolwowałoj. Hornjołužiski derby je nimale 1.000 přihladowarjow widźało.

posledni raz aktualizowane: 31. pražnika 2017, 06:24 hodź.