Rańše powěsće: póndźelu, 07.08.2017


Start do šulskeho lěta z ćežemi

Za wjace hač 57.000 šulerjow w Hornjej Łužicy započnje so dźensa nowe šulske lěto. Jědnaće šulow ma nowych nawodow, mjez nimi zakładnej šuli w Radworju a Worklecach. Do serbskich zakładnych šulow je sobotu 186 nowačkow zastupiło. Přirjadowanje wučerjow do šulow po wuprajenju kubłanskeje agentury we wšelakich šulach hišće doskónčne njeje. Tohodla so tež nastajenje hodźinskich planow tu a tam hišće dlije.


Twarske dźěła při spjatym jězorje

Při Budyskim spjatym jězorje přihotuje krajny zarjad za rěčne zawěry wot dźensnišeho ponowjenje spjatneju murjow. Tohodla je puć po muri wot parkowanišća w Delnjej Hórce zawrjeny. Wón budźe hakle klětu w nalěću zaso přistupny. Kaž zarjad zdźěli, dyrbja w přichodnych tydźenjach asfaltowu worštu na spjatnymaj murjomaj ponowić. Twarske dźěła maja hač do kónca oktobra trać a płaća 900.000 eurow.


Nowe wobličo za kulturnu informaciju

Serbska kulturna informacija w Budyskim Serbskim domje wostanje wot kónca awgusta za nimale měsac zawrjena, dokelž dyrbi so po dźesać lětach ponowić. To zdźěli Załožba za serbski lud jako nošer zarjadnišća. Wobdźěłać ma so na přikład parket předawanskeje rumnosće. Běrow sobudźěłaćerjow dyrbi so kompletnje wobnowić a techniskim narokam přiměrić. K tomu słušeja nowa elektrika, pobarbjenje sćěnow, nowe meble a zatwar nowych wohnjoškitnych duri.


Bagery přijědu pozdźišo

Zwottorhanje zadneju domow na Nutřkownej Lawskej w Budyšinje so dlije. Kaž zamołwita firma z Klukša zdźěli, čakaja hišće na wulki bager, kiž chcedźa tam zasadźeć. Twarnišćo je hižo spřihotowane, přichodny tydźeń chcedźa ze zwottorhanjom domow započeć. Prědnej domaj chce inwestor saněrować, na městnje zadneju planuje nowotwar. Před dwanaće lětami bě so tam při twarskich dźěłach dźěl zadneho domu sypnył. Wot toho časa so inwestor, twarska a planowanska firma před sudnistwami wadźa, štó je wina.


Serbske pěsnje w Słowakskej

Na folklornym festiwalu „Janošikove dni" w sewjernej Słowakskej poby kónctydźenja tež bus z Łužicy. Pod nawodom Volkmara Šołty z Hórkow wopyta 38 Serbow wjacore programy. Nimo toho spěwachu ze swójskeho spěwnika, kiž su młodostni skupiny z mjenom „Čłonstwo za integraciju ludoweje akordeonoweje kultury" za jězbu zestajeli. „Janošikove dni" je jedyn z najwjetšich festiwalow sewjerneje Słowakskeje, hdźež mějachu tutón króć na 1200 sobuskutkowacych na pjeć jewišćach.

posledni raz aktualizowane: 07. žnjenca 2017, 08:20 hodź.