Rańše powěsće: wutoru, 08.08.2017


Přerězne lěćo

W lěćnych prózdninach běchu kupjele w Hornjej Łužicy srěnjo wućežene. W Kulowskej lěsnej kupjeli su na horcych dnjach wokoło 400 hosći naličili, rekord leži pola 700, tak Beata Hufnagelowa wot měšćanskeho zarjada. Runje tak w Porchowskej kupjeli, hdźež bě w tydźenju před prózdninami tójšto wopytowarjow, w prózdninach samych pak njeběchu měnjateho wjedra dla hustodosć přewjele ludźi. Hač do kónca awgusta nadźijeja so wobhospodarjo kupjelow dale na ćopłe wjedro, zo bychu so wopytowarske ličby hišće powyšili.


Šulski material darmotny

Wot tutoho šulskeho lěta njetrjebaja šulerjo wjace za kopije dźěłoweho materiala a kapsne ličaki z grafikowymi funkcijemi płaćić. Dóstanu kopije darmotnje - ličaki wupožčene. Z tym so sudnistwowy wusud zwoprawdźa. Wosebite kapsne ličaki trjebaja šulerjo pak jenož w gymnazijach a to wot 8. lětnika. Wšě kóšty maja nošerjo šulow zwjesć. Zwjetša su to komuny. Serbske gmejny su so w zašłych lětach same wot so na to dźerželi. Na gymnaziju Serbskeho šulskeho a zetkawanskeho centruma Budyšin w nošerstwje Budyskeho wokrjesa je za darmotne wučbne srědki w tutym šulskim lěće 36.000 eurow zaplanowane, w zakładnej a we wyšej šuli je jich 14.000 eurow.


Nowa wjednica w Njebjelčicach

Nowa nawodnica Njebjelčanskeje pěstowarnje „Jan Skala - Barbojte kamuški" rěka Viktorija Brězanec. Je dotal jako kubłarka w Njebjelčicach skutkowała a wjednistwo wot 1. awgusta přewzała. To zdźěli wčera rěčnik Křesćansko-socialneho kubłanskeho skutka (CSB) Miłoćicy, kiž je nošer zarjadnišća. Zastupnistwo přewozmje Andrea Hejdušcyna. Wona budźe zdobom zamołwita za dźěło horta w zarjadnišću. Dotalna wjednica pěstowarnje, Anke Grofina, bě kónc junija swoju funkciju złožiła a so ze skutkowanja jako kubłarka rozžohnowała.


Witaj-camp w Jarješku

Na Witaj-camp za dźěći a młodostnych w Delnjej Łužicy je sej 13 wobdźělnikow dojěło. Dźěći přebywaja wot njedźele pod nawodom Viktora Zakara wot Rěčneho centruma Witaj w Jarješku blisko Pólskeje hranicy. Hač do pjatka so na wulětach, pućowanjach, při hrach a paslenju z delnjoserbšćinu zaběraja. Samostatne młodźinske lěhwo RCW lětsa mało přizjewjenjow dla wupadny - zajimowani młodostni pak so na zhromadnym campje z dźěćimi wobdźěla.


Zwjeselace wuwiće

Ponowjene bungalowy w lěsnej kupjeli w Nižej Wsy su lětsa połnje wućežene. Kaž zdźěli wjednica zastaranskeje GmbH Christina Hultschowa, su budki z NDR-skeho časa za 250.000 eurow dospołnje saněrowali. Tež za klětu maja hižo tójšto naprašowanjow. Zdobom maja w Nižej Wsy 200 stajnych hosći, kotřiž městno za swój karawan na poł lěta wotnajeja. Tež wone městna su dźeń a woblubowaniše, nic jenož pola seniorow, ale w přiběracej měrje tež pola młodych swójbow, kiž sej kónc tydźenja do zeleneho wuleća.


Posledna stacija wulki wupěch

Na poslednej staciji lětušeje bičwolejbuloweje tury Radija Satkula w Budyšinje je so 15 mustwow wobdźěliło. Před něhdźe 130 přihladowarjemi wudoby sej hosćićel z Budyšina 3. městno a mustwo Volkera Racha podleži w finalnej hrě Dwójnej nuli, kiž je zdobom faworit za wulki turněr w Miłoćicach kónc awgusta. K prěnjemu razej změja tam 20 mustwow, dokelž je turněr kóžde lěto woblubowaniši. Wčera wječor buchu štafle wulosowane.

posledni raz aktualizowane: 08. žnjenca 2017, 08:30 hodź.