Rańše powěsće: štwórtk, 10.08.2017


Rozrisanje hišće namakali njejsu

Libyski ćěkanc, kiž je mjez druhim zašły pjatk wulkozasadźenje policije w Budyšinje zawinował, wostanje w Budyskim wokrjesu. Móžnosć, jeho zwonka wokrjesa zaměstnić, njejsu namakali, rjekny wčera naměstnik krajneho rady, Udo Witschas. Zapósłanc krajneho sejma, Marko Šiman (CDU) sej žada: "By wažne było, zo tući ludźo, kiž maja hižo dwě lěće dołho register přeńdźenjow přećiwo zakonjam, žanu šansu wjace nimaja, w Budyšinje bydlić, a zo so jim zakaza, Budyšin wopytać." Budyski wokrjes je tole hišće loni wotpokazał. - Dalši namjet Šimana rěka: ćěkancow, kiž su wjacore razy kriminelnje napadnyli, w zhromadnym domje koncentrować a jich socialnje přewodźeć.


Hišće jedyn dźeń wothłosować

Dźensa je posledni dźeń, na kotrymž móža ludźo za wubědźowanje Fanta-iniciatiwy za hrajkanišća wothłosować. Sernjanske swójby leža tuchwilu na internetowej stronje z něhdźe 3.200 hłosami na 40. městnje. Jeli městno hač do wječora dźerža, dóstanu 1.250 € za swoje nowe hrajkanišćo. Nimo toho so tež swójbne cyłki z Łuha, Prěčec a Běłeho Chołmca na akciji wobdźěla. Cyłkownje je so 400 iniciatiwow po cyłej Němskej wo spěchowanje za swoje hrajkanišćo požadało - hač do 150. městna syda pjenježne myta.


Pytaja zrěčniwych Serbow

Budyski běrow "Stadtverführer" pyta Serbow, kiž maja chwile a lóšt, hosći w serbskej rěči po Sprjewinym měsće wjesć. Kaž zdźěli prokurist Manfred Lüdtke, nimaja hižo w zašłych dźesać lětach ani jeničkeho Serba, kiž wjedźenja přewjedźe, hačrunjež je naprašowanjow dosć. Wosebje žony su při tym narěčane, dokelž móža potom w serbskej narodnej drasće wustupować. Zajimcam poskići so wot kónca oktobra wosebity kurs na wječornej šuli.


Nowy semester z něhdźe 70 poskitkami

Serbske kubłanske srjedźišćo LIPA w Smjerdźacej zahaji přichodnu póndźelu swój nowy semester z něhdźe 70 kursami. Mjez druhim poskićuja rěčne, kreatiwne a strowotniske kursy. Nimo toho organizuja zaso dalekubłanja za kubłarjow a dopołdniši kruh za maćerje a dźěći. Tež kubłanskej wulětaj LIPA planuje. Wo wšěch kursach móža so zajimcy w brošurce wobhonić, kotraž wuleži mjez druhim na gmejnskich zarjadach.


Serbja pomhaja při měšćanskim běhu

Na lětušim Budyskim měšćanskim běhu so Serbja znowa při organizaciji wobdźěla. Kaž loni, staji tež lětsa zaso Załožba za serbski lud, kaž wčera zdźěli, foyer Serbskeho domu k dispoziciji za přizjewjenje sportowcow. Při tym pomhaja štyrjo čłonojo Serbskeho Sokoła zarjadowarjam. Kapitanka serbskeje žónskeje koparskeje wubranki, Janika Bětnarjowa, přewozmje sćoplenje dźěći za Bambini-běh. Nimo toho je na medaljach, wopismach, pokalach a webstronje titul zarjadowanja tež serbsce napisany. Loni je so na 1.700 sportowcow na Budyskim měšćanskim běhu wobdźěliło.

posledni raz aktualizowane: 10. žnjenca 2017, 08:40 hodź.