Rańše powěsće: pjatk, 11.08.2017


Multicar za Chrósćicy

Chróšćanscy gmejnscy radźićeljo su wčera nakup trjebaneho jězdźidła typa Multicar wobzamknyli.? Dotalne gmejnske awto je dodźeržane, tak wjesnjanosta Marko Kliman na posedźenju w Hórkach. Inwesticija w hódnoće 6500 eurow zmóžni so přez zalutowanja pola lětušeho gmejnskeho podźěla za Chróšćan pěstowarnju. Dźakowanu nišemu podźělej so tež dotalna napjata financna situacija gmejny tróšku polěpšuje.


Nowy wopon na Pančicy-Kukow

Gmejna Pančicy-Kukow ma nětko doskónčnje nowy wopon. Jón su gmejnscy radźićeljo na swojim wčerawšim posedźenju we Wotrowje jednohłósnje schwalili a runočasnje naćisk ze spočatka meje cofnyli. Tón je grafikar Šćěpan Hanuš předźěłał, tak zo je nětko tež Drježdźanski hłowny statny archiw přezjedny. Na woponje su widźeć lipowe a dubowe łopješko jako znamjo dwurěčnosće, wěža a čerwjena třěcha klóšterskeje cyrkwje, tři zelene hórki za pahórkatu krajinu w gmejnje a symbolizowana Klóšterska woda. Woponej dyrbi hišće wokrjes přihłosować.


Baberška nawoda wohnjoweje wobory

Wohnjowej woborje w Radworju a Minakale nawjeduje wot 1. awgusta Wincenc Baberška w swojej funkciji jako wjesnjanosta gmejny. Ze stron wobory tuchwilu žaneho nawodu nimaja. Nowy nawoda ma so hakle spočatk přichodneho lěta na hłownej zhromadźiznje wolić. W mjezyčasu pak měł wobornik tutu funkciju komisarisce přewzać, tak Baberška. Za to pyta runje zwólniweho kamerada. Dotalnej nawodaj Radworskeje a Minakałskeje wobory staj swoje zastojnstwo zwady z wjesnjanostu dla ke kóncej julija złožiłoj.


Spěchowanske pjenjezy za kliniku we Wojerecach

Klinika łužiskeje jězoriny we Wojerecach dóstanje dźensa spěchowansku zdźělenku we wysokosći něhdźe jednoho miliona eurow přepodatu. Pjenjezy su za staciju paliatiwneje mediciny. Spěchowansku zdźělenku přepoda dźensa Sakska statna ministerka za socialne naležnosće Barbara Klepsch. Po tym sej wona hišće na městnje dźěl kliniki wobhlada.


We Wojerecach Dźeń Serbskeje poezije

Dźensa wotměja we Wojerecach Dźeń Serbskeje poezije na česć Jurja Chěžki. Dopołdnja čitaja serbscy, němscy a wukrajni basnicy před šulerjemi Johanneuma. Wječor přizamknje so čitanje w měšćanskim hrodźe. Přihotował je dźeń basnik Benedikt Dyrlich zhromadnje z PEN-centrumom Němskeje a Wojerowskim wuměłskim towarstwom. Z čitanjomaj chcedźa Swjedźeń serbskeje poezije narunać, kotryž je dla zwady mjez přihotowanskim wuběrkom a předsydstwom Zwjazka Serbskich wuměłcow wupadnył.

posledni raz aktualizowane: 11. žnjenca 2017, 08:15 hodź.