Rańše powěsće: póndźelu, 02.10.2017


Leksikon serbskich předmjenow rozšěrjeny

Ministerstwa za nutřkowne wšitkich němskich zwjazkowych krajow kaž tež zwjazk sam wobsedźa mjeztym elektroniski dokument leksikona serbskich předmjenow. Sposrědkował je jón Stani Brězan, kotryž je ideju za leksikon měł a kotryž je w Sakskim ministerstwje za wědomosć a wuměłstwo zamołwity za serbske naležnosće. K tomu je Brězan přidał "Zakoń wo změnje mjenow za přisłušnikow mjeńšin", kotryž bu 1997 wot zwjazkoweho sejma schwaleny. W leksikonje wo serbskich předmjenach je wjace hač 1200 mjenow, kotrež buchu w zašłych sto lětach w serbskorěčnym rumje wužiwane chiba so dźensa wužiwa. Dospołny leksikon namakaće jako dataju w interneće pod adresu: www.sorbische-vornamen.de


Běrny, neple, kulki

Na hornjołužiskich polach so wšudźe běrny zběraja. W najwjace zawodach traja žně hišće hač do srjedź oktobra, tak tež w agrarnje GmbH w Hodźiju. Budyska Budissa wočakuje porno loni něšto snadniše žně, dokelž bě wjedro chětro měnjate. Wosebje za čas rósta w meji bě přesucho, praji tež Udo Nowak wot Zdźěrjanskeho ratarstwa. Tam su běrny hižo dozběrali a su z 43 tonami na hektar cyle spokojom.


Lejnjanski ratar wuznamjenjeny

Kónctydźenja su na Sakskej krajnej domchowance w Burgstädće štyri ratarske zawody počesćili, kiž so wosebje wo škit pčołki staraja. Mjez wuznamjenjenymi je tež zawod Ralfa Hentzschela z Lejna. Wón a třo dalši ratarjo su komisiju we wjacorych dypkach přeswědčili, mjez druhim, zo maja dosć nazhonjenjow wo pčołkach, zo z regionalnymi pčołarjemi zhromadnje dźěłaja a zo staraja so na swojich łukach a polach wo mnohotnosć kwětkow a kćejatych rostlinow.


Twarnišća wostanu dlěje twarnišća

W Pančicach Kukowje so dalši wotrězk puća ponowja. Dla nowotwara mosta nad Klóšterskej wodu a ponowjenja statneje dróhi S 100 je wot kónca tydźenja tež wotrězk wot přijězda k Netto hač k twarnišću před lutowarnju dospołnje zawrjeny. Hač do 15. oktobra tam hornju worštu asfalta wuměnja. Z Kamjenskeho směra pak hodźi so kupnica dale docpěć. A w Budyskich Schillerowych zelenišćach hišće dlěje twarja. Přičina su roły w zemi, kotrež su zblakami druhdźe leželi hač běchu w planach zarysowane. Dalša přičina: Při dotalnym dźěle njebě material stajnje dypkownje na twarnišću.


Serb znowa dumperowy mištr

Hižo druhe lěto zasobu je Filip Kral z Róžanta Němski mišter w jězdźenju z dumperom. Wicemišter bu Markus Donath z Baćonja. Tež pjaty a posledni běh mišterstwow wčera w Hórkach staj wonaj w samsnym slědźe dobyłoj. Je to hižo 15. lěto, zo so přećeljo dumperow z wjacorych kónčin kraja wo titul němskeho mištra wubědźuja. Mustwowe hódnoćenje wčera a tež cyłeho lěta 2017 dobychu Lejnjanscy sportowcy před teamom z Adelsdorfa/Quersa.

posledni raz aktualizowane: 05. winowca 2017, 08:59 hodź.