Rańše powěsće: pjatk, 06.10.2017


Projetky: So wo spěchowanje požadać

Kooperaciski program mjez Pólskej a Sakskej - INTERREG 2014-2020 - wotnětka zaso spěchowanske srědki wudawa. Zajimcy móža so ze swojimi projektami hač do kónc nowembra požadać. Za projekty k škitej a wuwiću přirodneho a kulturneho herbstwa steji sydom milionow eurow k dispoziciji. Cyłkownje spěchuje so INTERREG program za nahranične kónčiny Pólskeje a Němskeje ze 70 milionami eurow z Europskeho fonda za regionalne wuwiće. Mjez druhim so na tajkich projektach tež Njebjelčanska gmejna wobdźěli.


Młodźina: Za wjac mjenšinowych prawow

Třo zastupjerjo Pawka su tučasnje z něhdźe 30 dalšimi młodostnymi, kotřiž přisłušeja europskim mjeńšinam, na busowej turje po Europje. Zwjazk młodźiny europskich narodnych skupin - MENS - organizuje k prěnjemu razej tajku busowu turu. Wopytajo mjeńšiny w susodnych krajach Němskeje kaž w Danskej, Nižozemskej, Belgiskej, Francoskej, Šwicarskej, Italskej a Čěskej, wabja tam tež za Minority Safe Pack iniciatiwu, kotraž zasadźuje so za skrućenje mjeńšinowych prawow na europskej runinje. Njedźelu su w Chrósćicach z hosćom, zo bychu tež na tamnišej pokalnej hrě za podpisanje wabili.


Dźěwin: Kolesowarske šćežki ponowja

W gmejnje Dźěwin ponowja hač do kónc nowembra kolesowarske šćežki. Gmejna wuda 52.000 eurow za to. Mjez druhim matej so kolesowarska šćežka w Dźěwinje a puć kołowokoło Brězowskeho jězora ponowić. Wčera je gmejnska rada za to dźěłowy nadawk wudała.


Běła Woda: Ideje za swobodnu šulu

Něhdyša spěchowanska šula we Běłej Wodźe móhła so ze swobodnej šulu stać. Twar, sportowa hala, sportnišćo a bliska přiroda skića najlěpše wuměnjenja za alternatiwny kubłanski koncept. To praji wyši měšćanosta Torsten Pötzsch. Za twar pak by dalši wužiwar trěbny był, dokelž je za šulu samu přewulki. Wotpowědne ideje a koncepty wšelakich iniciatiwow chcedźa w přichodnych měsacach w měšćanskich wuběrkach diskutować. Dotal w Běłej Wodźe swobodnu šulu nimaja.


Ansambl: Přichodni komponisća pytani

Za prózdninski kompoziciski kurs Serbskeho ludoweho ansambla přichodny tydźeń móža so hišće zajimcy přizjewić. Poprawom je znajmjeńša pjeć wobdźělnikow trěbnych, tak Stefan Cuška wot SLA, tola kurs so tež přewjedźe, njeje-li naposledk telko zajimcow. Pod nawodom komponista Jana Cyža zaběraja so wobdźělnicy ze zasadami hudźby a kak swójsku melodiju do notow přenjeseš. Zajimcy měli znajmjeńša 14 lět być, noty čitać móc a instrument wobknježić.


Maltezojo: Rozšěrja swój posktik

Po přećahu do Kamjenca chce ambulantna hladarska słužba Maltezow swój poskitk rozšěrić. Tak budu potom tež poradźowanske rozmołwy w Kamjenčanskej chorowni poskićeć. Dokelž su za to hišće wšelake přihoty trěbne, so doskónčny přećah hišće tróšku dliji, tak Marika Nowakowa wot Maltezow. Poprawom měł přećah wot Worklec do Kamjenca hižo spočatk oktobra zakónčeny być. Zastaranje pacientow pak je zaručene.


Nakładnistwo: Bórze čitanska turneja

Swoju tradicionelnu nazymsku čitansku turneju zahaji Ludowe nakładnistwo Domowina lětsa 16. oktobra z knižnej premjeru Serbskeje protyki 2018 w Delnich Sulšecach. Nimo toho wotměja so tři dalše knižne premjery. Stej to dźěćacej knize „Z Francom po swěće" a „Lěćo za započatkarjow". Swoju wědomostnu knihu, kiž so wyšemu hamtskemu hejtmanej Hornjeje Łužicy, hrabi von Gersdorf wěnuje, předstaji Lubina Malinkowa. Na dohromady dźesać zarjadowanjach čitaja awtorki a awtorojo z nowych knihow, mjez druhim tež z njedawno wušłeje antologije serbskeje prozy „Mlóče".

posledni raz aktualizowane: 06. winowca 2017, 07:49 hodź.