Rańše powěsće: póndźelu, 09.10.2017


Profije z hosćom byli

W Sakskim koparskim pokalu su Chrósćicy wčera přećiwo FSV Šwikawje z 0:5 podleželi. Běše to duel mjez amaterami 7. ligi a profijemi 3. němskeje ligi. Po hrě praji jednaćel Tadej Cyž: "Hosćo su byli měrni, problemy z wěstotu njejsmy měli. Myslu sej, zo su tež naši fanojo z tym spokojom byli, kak so naše mustwo prezentowało je. Nam je jasnje było, zo prědku přewjele njepoběži. Štyri wrota wot tych pjeć su byli standarty, to dyrbimy polěpšić. Na kóncu pak je to rjany swjedźeń za nas był." Wčerawšu hru je wjac hač 700 přihladowarjow widźało. Za nju dyrbjachu w Chrósćicach wosebite žadanja Sakskeho koparskeho zwjazka spjelnić. Tež policija, wohnjowa wobora a dalši dobrowólni su na městnje pomhali. -- Hižo sobotu je mustwo z Ćiska přećiwo Chemij Lipsk z 1:3 z pokala zlećało. Tuta hra mustwow sydmeje a štwórteje ligi wotmě so před 850 přihladowarjemi we Wojerecach.


Nazymska tradicija w Serbach

W Njebjelčicach je so wčera popołdnju lětuši rjad Nazymskich koncertow zahajił. K tomu je Radworski chór "Meja" wjac hač hodźinski program wuhotował. 80 hosći je we wosadnicy "Bjesada" na zabawne wašnje wosebje serbske, ale tež mjezynarodne spěwy dožiwiło. W přichodnych tydźenjach slěduje hišće wosom dalšich Nazymskich koncertow. Přichodnej w Hornjej Łužicy stej za dwě njedźeli - 29. oktobra - w Radworju a Chrósćicach.


Dwurěčny žnjowy dźak w Ptačecach

W Ptačecach su wčera na žnjowym dźaknym swjedźenju němsko-serbske kemše swjećili. Tójšto dźěći, holcow a žonow je so k tomu Wojerowsku serbsku drastu woblekło. Při woblěkanju su jim Čornochołmčanske žony pomhali. Na spočatku běchu so kemšerjo před Ptačečanskej domizniskej stwu zhromadźili, zwotkel ćehnjechu k zwukam zwonow k cyrkwi. Po kemšach a čestnym kole po wsy skrónowachu lětušeho "Krala kirbsow". Je to Theo Kolan, kotrehož kirbs wažeše 39 kg.


Bohaty poskitk k prózdninam

Tež w druhim tydźenju nazymskich prózdnin čaka na łužiske dźěći zaso tójšto poskitkow, tež serbskich. Tak prosy Serbski muzej w Budyšinje jutře na dyrdomdejske wjedźenje po měsće, a štwórtk po wosebitej wustajeńcy wo Krabaće. W muzeju w Kamjencu pokazaja jutře, kak su so dźěći něhdy hrajkali - a štwórtk, kak so zwěrina w zymje zežiwja. W biosferowym rezerwaće započnje so dźensa pjeć dnjowski camp, kotryž so wosebje z łudźenjom zaběra. Dźěći dekanataneho dušepastyrstwa wotjědu dźensa na štyri dny do Naumburga. Z hudźbu zaběraja so porno tomu młodostni a dorosćeni tutón tydźeń na dźěłarničce za komponowanje w Serbskim ludowym ansamblu. A w domje Jurja Brězana w Hornim Hajnku chce Rěčny centrum Witaj wot jutřišeho wšědnje dopołdnja z dźěćimi paslić, pućować a čitać.


Domchowanka w Koćinje

Žnjowy dźakny swjedźeń Koćinjanskeho Krabatoweho mlokoweho swěta sobotu bě jara derje wopytany. Na 50 ratarjow, rjemjeslnikow a wikowarjow poskićeše na kermušnych wikach regionalne speciality. Mjez nimi běchu tež pčołar Šołta z Konjec, pomnikoškitar Žur z Chrósćic a Spalowske Domizniske a kulturne towarstwo. Wone demonstrowaše, kak so tradicionelnje jabłučnica čini, kotruž plincam přidawachu. Wustajeńca hribow je na 30 družinow pokazała. Wubědźowanje wo najćešu běrnu je Krügarjec swójba z Němcow dobyła - z wjac hač tři bědl kilogramom ćežkej běrnu.

posledni raz aktualizowane: 09. winowca 2017, 08:38 hodź.