Rańše powěsće: srjedu, 11.10.2017


Ha widźuli ptačata ćahyć......

Najwjace ćahatych ptačkow je mjeztym Hornju Łužicu wopušćiło - jako prěnje wurle, potajkim čorne łastojčki ( Mauersegler ), tež baćony su so před měsacom na puć do juha podali. Wjetšina škórcow pak tu hišće je, rjekny sobudźěłaćer Sakskeje přirodoškitneje stacije w Njeswačidle. Mjeztym su prěnje ptaki ze sewjera přilećeli, zdźěla zo bychu přez zymu wostali. Najbóle napadnu tuchwilu sewjerne husy, kiž so wodnjo na šćernišćach pasu, nimo toho jednotliwe spěwate kołpje a žorawje. W přichodnych tydźenjach móhli tysacy ptakow přilećeć. Hač wostanu, wotwisuje wot wjedra - při sněhu ćahnu dale do zapada.


Ewangelska šula w Huskej požadana

Ewangelska zakładna šula w Husce so jara derje přiwza. Za šulske lěto 2018/19 maja tam za prěnjej rjadowni z 48 městnami nimale 80 přizjewjenjow. Tuta ličba so po dotalnych nazhonjenjach relatiwizuje, rěka ze stron nošerja, Ewangelskeho šulskeho towarstwa. Starši su snano swoje dźěći na wjacorych šulach paralelnje přizjewili abo je tola wo lěto wróćo stajić dadźa. W Husce maja nimo toho ewangelsku srjedźnu šulu a ewangelski gymnazij. - Serbska rěč a kultura je so w zašłosći hdys hdys w šulskich abo zwonkašulskich projektach wobkedźbowała, tuchwilu žane tajke njejsu.


Slepo chce komunalneho poradźowarja

Gmejna Slepo přeje sej tež za přichod komunalneho poradźowarja. Nadawk jako tajki zastupjer jich zajimow a moderator napřećo brunicowemu koncernej LEAG ma dóstać něhdyši sakski nutřkowny minister a dźensniši prawiznik Klaus Hardrath. Tole wobzamkny wčera z wjetšinu gmejnska rada Slepo. Płaćić ma komunalneho poradźowarja po měnjenju gmejny LEAG, po principje zawinowarja. Hardrath budźe zdobom tež gmejnu Trjebin zastupować. Na próstwu wo jasne definowanje jeho nadawkow nimaja hišće wotmołwu z koncerna - za jutře su dalše rozmołwy předwidźane.


Mnozy chcedźa dźěći adoptować

W Hornjej Łužicy je so loni po podaćach ze Statistiskeho zarjada Sakskeje w Kamjencu 26 dźěći adoptowało. Dwě třećinje z nich běchu młódši hač šěsć lět. Nimo toho bě hač do kónca 2016 22 holcow a hólcow w probowym času za dźěći a potencielnych staršich žiwe, abo w tak mjenowanym "adopciskim hladanju". Kaž zarjad nimo toho zdźěli, chce w Hornjej Łužicy tuchwilu 87 swójbow dźěćo přiwzać.


Nowe technologije we Wojerecach

We Łužiskim technologiskim centrumje we Wojerecach buchu wčera aktualne inowacije a technologije prezentowane. Wustajerjo přindźechu mjez druhim z TU Kamjenicy, Statneje akademije Budyšin a Wysokeje šule Žitawa/Zhorjelc a IHK Drježdźany. Ale tež mjeńše a srjedźostawske firmy z regiona so wobdźělichu. Přez přednoški a wuměnu nazhonjenjow dóstachu nastorki za přistup k najnowšej wědźe a podpěru za dalšu digitalizaciju.


Twarskej projektaj Mužakowa zakónčenej

Město Mužakow móže w tutych dnjach dwaj ze swojich lětušich twarskich projektow zakónčić. W sportowni buchu z pomocu spěchowanskeho programa "Mosty do přichoda" mjez druhim špundowanje a připrawy za wopłočki wobnowjene. Kónc tydźenja hraja prěni raz w hali zaso mjetarjo z Krušiwcy. Tež přestworjenje naměsta při cyrkwi w Mužakowje je nimale wotzamknjene. Tute ma so na dnju reformacije poswjećić.

posledni raz aktualizowane: 11. winowca 2017, 08:09 hodź.