Rańše powěsće: wutoru, 07.11.2017


Fachowe schadźowanje "Łužica a serbska identita"

Wjesnjanosća a měšćanosća gmejnow serbskeho sydlenskeho ruma w Budyskim wokrjesu su so wčera z temu „Łužica a serbska identita" zaběrali. K tomu słyšachu w Budyšinje wjacore přednoški wo dwurěčnosći w zjawnosći a politiskich aktiwitach Serbow. Mjeztym druhe tajke fachowe schadźowanje bě wuhotowała społnomócnjenja za serbske naležnosće Budyskeho wokrjesa, Regina Krawcowa.


Spěchowanske myto za demokratiju do Wojerec

Wojerowske towarstwo RAA je wčera lětuše myto za demokratiju dóstało. Towarstwo podpěruje wopory prawicarskeje namocy. Towarstwo RAA bu spočatk 90-tych lět załožene jako namóc prawicarjow přiběraše. Dźensa zaběraja so čestnohamtscy wosebje z poradźowanjom młodźiny a pedagogiku demokratije, na přikład w šulach. Wot lěta 2007 so wosebita próca za demokratiju mytuje. Lětsa je so dohromady 56 iniciatiwow, projektow a komunow wo myto powabiło.


Kamjenc nochce kupjel

Město Kamjenc nochce swoju měšćansku kupjel za symboliski euro přewzać. Radźićeljo Lessingoweho města na jutřišim posedźenju poskitk Budyskeho wokrjesa prawdźepodobnje wotpokazaja. Tón chce halowu płuwarnju rady wotbyć, dokelž dyrbi so wona nuznje ponowić. Nimo toho krajnoradny zarjad za wobhospodarjenje Kamjenskeje kupjele lětnje štwórć miliona eurow připłaći. Ju zawrěć, pak njepřińdźe do prašenja, tež, hdyž město halu njekupi, zdźěli nam wčera rěčnik zarjada na naprašowanje.


60 lět Trabi

Dźensa před 60 lětami je w Šwikawje prěni "Trabant P50" produkcisku halu wopušćił. Hač do lěta 1990 so "Trabi" twarješe. W Budyskim wokrjesu je tuchwilu hišće někak 900 awtow tuteho typa přizjewjene. Před 6 lětami bě jich hišće někak 1000. Tójšto mjenje eksemplarow je mjeztym wot druheje NDR-skerje marki, Wartburg, po puću. Wonych awtow z Eisenacha je w Budyskim wokrjesu hišće někak 200 registrowane.


Kamjenc pyta decernentku

Město Kamjenc zwaži sej druhi pospyt při pytanju za nowej decernentku za měšćanske wuwiće a socialne. Tuchwilna zamołwita, Elvira Schirackowa, poda so ke kóncej lěta na wuměnk. Hižo před 9 měsacami běchu zamołwići w radnicy Lessingoweho města zastojnstwo zjawnje wupisali. Dwaj zajimcaj běštaj so tež přizjewiłoj. Wyši měšćanosta a měšćanscy radźićeljo pak njemóžachu so na žaneho z njeju dojednać. Pytana decernentka je zamołwita za pěstowarnje, šule a młodźinske dźěło, kaž tež za porjad, wěstotu a twarske naležnosće w měsće.

posledni raz aktualizowane: 07. nazymnika 2017, 07:12 hodź.