Rańše powěsće: srjedu, 29.11.2017


Zazběh do adwenta

Budyski tachantski kantor Friedemann Böhme předstaji zhromadnje z třomi hudźbnikami k prěnjemu adwentej mału hudźbnu sensaciju. Jedna so wo tři sonaty sławneho Drježdźanskeho komponista Johanna Gottlieba Naumanna, kiž je Friedemann Böhme w Drježdźanskim archiwje namakał. Tute sonaty Naumanna zaklinča sobotu we Weimarje a njedźelu wječor w Budyskej Serbskej cyrkwi.


Wojerecy dyrbja lutować

Pjenježne problemy so za město Wojerecy hač do lěta 2020 přiwótřa. Na wčerawšim posedźenju měšćanskeje rady wozjewi wyši měšćanosta Stefan Skora, zo změja hižo klětu 6,6 milionow eurow deficita. Jedna z přičinow je, zo stupaja přiražki za pěstowarnje. Tež wulke zawody, kotrež přinjesu dawki, we Wojerecach žane nimaja. Financny wuběrk ma nětko nadawk, lutowanski program nastajić, w kotrymž njeměło jenož wo to hić, pjenjezy zalutować, ale wo to, priority sadźeć.


Z gmejnskeje rady Malešecy

Wohnjowe wobory Malešanskeje gmejny dóstanu hišće lětsa nowe škitne maski za dychanje, tak zo su potom wšě wohnjowe wobory gmejny kompletnje wuhotowane. Płaći to 31.000 eurow - nadawk za firmu ze Sakskeje su radźićeljo wčera wudźělili. Tež wokna we twarjenju wohnjoweje wobory, hdźe ž wužiwa Malešanska wyša šula někotre runmnosće za domjacnosć a ručne dźěło, chce gmejna ponowić dać. Nadawk w hódnoće 10.000 eurow dósta blidar z gmejny.


Ze słowami kuzłać

Serbski blog a k tomu słušaca facebookowa strona "wopačni bratřa" rosće. W zašłych dnjach je administrator Robert Maćij móhł znowa přikłady online stajić, w kotrychž pokaza na podobnje klinčace słowne poriki w serbšćinje a druhich rěčach. Wobě słowje pak matej cyle wšelaki woznam. Přinošk z někotrymi rěčnymi přikładami namakaće tu online.


Wuknjenje rěče wolóžić

W Choćebuzu je wušła nowa kniha „Pó serbsku! - Gramatika za wuknjecych". Rěčny centrum WITAJ je ju za delnjoserbšćinu wuknjacych wudał. Kniha zaběra so na lochke wašnje z delnjoserbskej gramatiku. K tomu su w njej husto wužiwane frazy, kotrež maja dwurěčnym šulerjam přistup k delnjoserbšćinje wolóžić. Nimo toho je kóždy tekst tež do němčiny přełoženy. Zwučowanski zešiwk, kiž ke knize słuša, ma klětu wuńć.


Zajim dotal snadny

Za 36. Sokołski wolejbulowy turněr wo pokal Domowiny, kotryž je za 10. měrca planowany, je so dotal jenož jeničke mustwo přizjewiło. Je to cyłk abiturneho lětnika 1996. To je Serbski Sokoł zdźělił. Zo předleži měsac do přizjewjenskeho kónca jeničke přizjewjenje, je njewšědne. Lětsa bě so při najwjetšim ludosportowym wolejbulowym turněrje wokrjesa Budyšin 20 cyłkow wobdźěliło.

posledni raz aktualizowane: 29. nazymnika 2017, 10:24 hodź.