Rańše powěsće: štwórtk, 07.12.2017


Kulow žno plan za 2018 nastajił

Financny etat města Kulow za klětu wučinja 7,7 milionow eurow. Z nich ma so 2,2 milionaj inwestować. To su měšćanscy radźićeljo wčera z klětušim hospodarskim planom wobzamknyli. Najwjetši projekt budźe klětu twar noweje pěstowarnje, kotraž změje ze žłobikom a hortom wjac hač 200 městnow. Dotalna w Jakubetzowym domje by dyrbjała wohnjoškit polěpšić a je přemała. Něhdźe štyri miliony eurow twar płaći, za klětu su połdra miliona zaplanowali. Nimo toho ma so w Kulowje zakładna šula dale saněrować a wohnjowa wobora lěpje wuhotować.


Turistiskej zwjazkaj so zjednoćitej

Turistiskej zwjazkaj Delnja Łužica a Łužiska jězorina so k nowemu lětu zjednoćitej. Tak chcedźa w přichodźe wobsahi zwjazać, košty lutować a region jednotnje wuwiwać. Mjeno zwjazka pak ma Łužiska jězorina wostać, kaž wčera na posedźenju zwjazka wozjewichu. Nimo toho su tam swój nowy marketingowy plan předstajili, z kotrymž chcedźa zaměrnišo wopytowarjow do regiona wabić. Ćežišća su nowa internetowa strona, dožiwjenska karta a lětakaj. Při wabjenju chce so turistiski zwjazk w přichodźe hišće bóle na swójby a Čěsku koncentrować.


W klětušich planach rěčeli

Předsydstwo Wojerowskeje župy "Handrij Zejler" je na swojim wčerawšim posedźenju wo 750. jubileju města Wojerec wuradźowało. K tomu chcedźa 14. junija na Domowinskej ležownosći dźeń wotewrjenych duri přewjesć. Tam maja so dwurěčne šule, pěstowarnje a towarstwa župy předstajić, tak regionalna rěčnica Christina Šołćina. Nimo toho wobkrućichu župne namjety zajimcow za Saksku šulsku konferencu, kotrež dyrbja so nětko hišće wot Domowiny schwalić. Tohorunja rěčachu wo tym, kak móhli klětu noweho projektoweho managera Domowiny za swoje předewzaća zapřahnyć.


Za Minority SafePack wabił

Předsyda Domowiny Dawid Statnik je wčera radźićelam Zhorjelskeho wokrjesneho sejmika do jich posedźenja europsku wobydlersku iniciatiwu Minority SafePack předstajił. Wón rozkładźe jim zaměry a wotpohlady iniciatiwy přepodaše podpisanske lisćiny. Přeprosył bě jeho tamniši krajny rada Bernd Lange. Přichodnu póndźelu wón za Minority SafePack w Budyskim wokrjesnym sejmiku wabi.


Wěstotu wobchada zwyšić

Hornjołužiska a čěska policija chcetej so zhromadnje wo wjace wěstoty we wobchadźe nakładnych awtow prócować. Za to je Zhorjelska policajska direkcija wutoru z direkcijomaj Liberec a Usti nad Labem zrěčenje podpisała. Za kooperaciski projekt dóstanu mjez druhim transporter z modernej widejowej techniku za kontrole nakładnych awtow. Tež zhromadne seminary a mjezsobne hospitacije su planowane. Wulki problem za wěstotu je po informacijach Zhorjelskeje policije, zo spedicije datowe nastroje w awtach manipuluja. Tak móža dlěje a spěšnišo jězdźić hač dowolene.


Do toho druhi trenar nětko prěni

Robert Hoffmann je nowy trenar lodohokejoweho mustwa Łužiskich liškow w Běłej Wodźe. Kaž klub wčera zdźěli, su so w dorěčenju z hrajerjemi rozsudźili, zo ma dotalny druhi trenar mustwo dale nawjedować. Šeftrenar Hannu Järvenpää bě zašły tydźeń wotstupił, na to bě Hoffmann nachwilnje přewzał. Zašły kónc tydźenja su Liški dwójce dobyli. W tabulce druheje němskeje ligi steja pak dale na předposlednim městnje.

posledni raz aktualizowane: 07. hodownika 2017, 08:29 hodź.