Rańše powěsće Serbskeho rozhłosa


Tójšto komunow bjez etata

18 hornjołužiskich komunow njeje hač do kónca prěnjeho połlěta hišće žadyn hospodarski plan za lětsa zapodało. To wuńdźe z wotmołwy sakskeho ministerstwa za nutřkowne na naprašowanje z frakcije Lěwicy w Krajnym sejmje. Mjez komunami bjez hospodarskeho plana su Chrósćicy, Malešecy, Njebjelčicy, Worklecy, Ralbicy-Róžant, Niska a Běła Woda. Po měnjenju komunalnopolitiskeho rěčnika Lěwicy Andréja Schollbacha zaleži to na tym, zo kraj přeco zaso komunam nadawki nabrěmjenja, bjez toho zo dóstanu wone trěbne pjenjezy wot stata.


Truskalcowa sezona hubjeńša hač loni

Sezona truskalcow je w Hornjej Łužicy zakónčena a je tu lětsa mjenje wunjesła hač w zašłych lětach. Wina běchu zapozdźene zmjerzki w pózdnim nalěću, při kotrychž prěnje kćenja zmjerznychu. Truskalcowy plahowar Christian Bock je na swojich polach w Kašecach, Großnaundorfje a Biskopicach něhdźe štwórćinu mjenje płodow žnjał hač loni. Pola firmy Stolle-Obst w Šěrachowje su truskalcowe žně samo wo 30 procentow mjenje wučinili. Wokomiknje móža zajimcy w Kašecach hišće maleny, módre jahodki a čorne janske jahodki sami šćipać.


Ani jenički hosćenc w Bukecach

W Bukecach dotal wotwidźeć njeje, zo so jedyn z něhdy štyrjoch hosćencow wsy znowa wotewrěje. Zdźěla běchu mějićeljo z hospodarskich přičin cofnyli, zdźěla njejsu dotalni wobsedźerjo naslědnika namakali. W tak mjenowanym Pěskowčiku (Gerichtskretscham) chcyše inwestor njedawno casino wotewrić, njeměješe pak za to dowolnosć krajnoradneho zarjada a gmejny, tak wjesnjanosta Norbert Wolf. Tuchwilu maja w Bukecach jenož imbis na parkowanišću, ale hižo žadyn hosćenc.


Wuknyć po swjatoku

Budyska Ludowa wysoka šula je wozjewiła swój program za nowy nazymski semster, kiž startuje 7. awgusta. Změja zaso wobšěrny poskitk kursow ze wšelakich wobłukow, kaž rěče, kultura, strowota, zakładne a powołanske kubłanje. Mjez druhim poskićuja wjacore kursy čěšćiny a pólšćiny. Za serbšćinu maja jenož jenički kurs, kiž je mysleny za ludźi z dobrymi zakładnymi znajomosćemi. Budyska Ludowa wysoka šula ma stejišća w Budyšinje, Kamjencu, Biskopicach a Radebergu.


Za bulom honili

Na wčerawšej beachwolejbulowej staciji radija Satkule w Pančicach-Kukowje wobdźěli so dohromady 16 mustwow. Prěnje městno wudobychu sej hrajerjo "Dwójneje nule II" - woni přesadźichu so přećiwo teamej "Mixery". Dominanca mustwa "Dwójneje nuly" zwosta z tym skrućena. Najebać špatneho wjedra wopyta hry wčera něhdźe 150 ludźi. Přichodny tydźeń poda so młodźinska redakcija Satkule do Chelna pola Radworja. Tam změja lětsa premjeru.

posledni raz aktualizowane: 25. pražnika 2017, 16:40 hodź.