Serbske powěsće rańšeho wusyłanja : Aktualne powěsće: pjatk, 25.05.2012

Němska mjeńšina z Danskeje je swoje městno na EUROPEADŹE k dispoziciji stajiła. Zastupjerjo mjeńšiny informowachu přihotowanski wuběrk, zo nimaja mustwo, kotrež móhło so na koparskich mišterstwach wobdźělić. Móžni kandidaća buchu hižo narěčeni, hač so narunanje namaka, pak njeje hač dotal jasne.

Gmejnski parlament Worklecy je wčera wobzamknył lětuši etat we wysokosći 1,6 milionow eurow. Z toho je běrtl miliona za inwesticije. Najwjace pjenjez zasadźa w zakładnej šuli za nowotwar nuznikow, druhi ćěkanski puć a garderoby. Dale inwestuja do noweho awta za wohnjowu woboru, do wobnowjenja pućow a do nastrojow za hrajkanišća.

Znowa su njeznaći w Budyšinje nalěpili na němskorěčne pućniki čerwjene nalěpki z prašenjom „A serbsce?“ Prěnje běchu so póndźelu jewili a buchu wotstronjene. Wčera je społnomócnjeny za serbske naležnosće w Budyskim wokrjesu, Benedikt Cyž, akciju raznje wotpokazał a bjezzmysłowu mjenował. Wona wobškodźi wěcy a poćežuje tamny wažny projekt, mjenujcy zmylki na serbskorěčnych taflach a pućnikach skorigować, tak Cyž.

Na Domowinsku jězbu do Prahi 1.julija poda so 10 busow, dotal je so něhdźe 150 ludźi přizjewiło. Budu sej swjedźenski ćah k Wšosokołskemu zlětej wobhladać a wopytaja oratorij „Nalěćo“. Brětnjanska rejowanska a drastowa skupina, Přezpólni, Wotrowscy koparjo a předsydstwo Serbskeho Sokoła mjez druhim w swjedźenskim ćahu sobu póńdu. Dalše kulturne a sportowe skupiny móhli rady hišće sobu činić, rjekny wčera kulturny referent Domowiny, Clemens Škoda.

Nukec napojowa firma je wčera wotewrěła nowu filialu w Budyskim nowym měsće pódla Aldija we něhdyšim Schlecker-wobchodźe. Firma něhdyšeho předsydy Domowiny, Jana Nuka, je při tym jednu ze Schlecker-předawarkow přewzał a hišće dalšu přistajił. Dohromady maja nětko 16 hłownych přistajenych a 10 pomocnikow.

K prěnjemu razej je wčera wolejbulowe mustwo Serbskeho gymnazija Budyšin w Sakskim wolejbulowym finalu starobneje klasy 3 medalju dobyło. Hólcy wokoło kapitana Mateja Cyža docpěchu w Dippoldiswalde jako prěnje serbske mustwo w krajnym finalu bronzowe městno. Hižo w lětomaj 2002 a 2004 je Serbski gymnazij w kónčnym kole zastupjeny był a stajnje 4. městno docpěł. Wčerawši wuspěch je dotal najwjetši w sportowych stawiznach Serbskeho gymnazija.