Radijo SATKULA | 16.11.2015 | 21:00 hodź. Newsy ze wsy
Hauptinhalt
19. nazymnika 2015, 09:55 hodź.
Kóždu póndźelu wječor - zdypkom w 21.00 hodźinach - zhoniće w młodźinskich wusyłanjach RADIJA SATKULE, što je noweho w Serbach. Wězo wěnujemy so w prěnim rjedźe młodźinskim temam. Ale tež tu a tamnu kurioznu podawiznu, kotraž sta so zwonka Łužicy, Wam sposrědkujemy.
World cafe
Derje wopytane bě wutoru diskusijny wječor k temje azyl w klubowni serbskeho internata w Budyšinje. Młodostni wuměnichu sej mysle wo swójskich strachach, kotrež jich hladajo na problematiku ćěkańcow zaběraja. Nimo toho informowachu so wo móžnosćach swójskeho angažementa a zhonichu zdobom wo strachach a wočakowanjach ćěkańcow, kotrež do Němskeje přińdu. Za to stejachu młodostnym wšelacy fachowcy k dispoziciji. Běše to poskitk Domowiny a Rěčneho centruma WITAJ.
Chcedźa so wobarać
Sakska serbska rada žada sej krute městno za Serbow w rozhłosowej radźe. To praji nam po dźensnišim posedźenju rady předsydka Marja Michałkowa. Čłonojo chcedźa so w přichodźe ze swojim apelom na Drježdźansku statnu kencliju wobroćić a zamołwitym list napisać. Bjarnat Cyž bě dotal posledni serbski čłon w rozhłosowej radźe, wón bě w njej hač do lěta 2009 Serbow zastupował.
“Šula bjez rasizma – šula z kuražu”
Zetkanje inicjatiwy “Šula bjez rasizma – šula z kuražu” wotmě so sobotu w Budyskim serbskim zetkawanskim centrumje. Šulerjo a wučerjo z cyłeje Sakskeje zetkachu so, zo bychu so za wjace tolerancy na šulach zasadźili: Tak zaběrachu so w dźěłarničkach z temu demokratija a natočichu mjez druhim krótke widejowe sekwency. Serbski gymnazij samy njebě zastupjeny, dokelž njeje hišće wobstatk projekta.
Senzacija za Kamjenc!
Krajny koparski ligist Jednota Kamjenc je so wčera w krajnym pokalnym kole za połfinale kwalifikował a hraje w měrcu 2016 doma přećiwo regionalnemu ligistej FSV Zwickau. Dalša połfinalna partija rěka klětu Dynamo Drježdźany – FC Rudne horiny Aue.
