Radijo SATKULA | 30.08.2010 | 21:00 hodź.
Newsy ze wsy
Kóždu póndźelu wječor - zdypkom w 21.00 hodźinach - zhoniće w młodźinskich wusyłanjach RADIJA SATKULE, što je noweho w Serbach. Wězo wěnujemy so w prěnim rjedźe młodźinskim temam. Ale tež tu a tamnu kurioznu podawiznu, kotraž sta so zwonka Łužicy, Wam sposrědkujemy.
Twjerda hudźba blisko skały
Festiwal „Nukstock“, kiž wotmě so kónc tydźenja w Nuknicy, bě derje wopytany. Kaž organizatorojo zdźělichu, su z „metal-festiwalom” při Nukničanskej skale jara spokojom. Wustupiło je dźewjeć skupinow z twjerdšej hudźbu. Wjeršk běše drje skupina Waltari, za kotruž bě to lětsa jenički open air koncert w Němskej. Dotalny organizaciski team je lětuši 12. festiwal posledni raz zarjadował. Klětuši „Nukstock” přewozmje potom młódša generacija.
Poslednje kemše
Po pjeć lětach su so wosadni we Wotrowje wčera ze swojim fararjom Tomaszom Dawidowsim rozžohnowali. We swojim prědowanju zhladowaše duchowny na čas skutkowanja we Wotrowje a dźakowaše so wosadnym. Za Wotrowsku wosadu budźe zamołwity dekan Clemens Hrjehor. Farar Dawidowski přewozmje měšniske město w vogtlandskim Reichenbachu.
Narodna drasta a moda
Na modowej přehladce sobotu wječor w braniborskim Gubinje buchu wuslědki projekta „Sorbisch modern“ předstajene. Studenća akademije za modu a design běchu so wot serbskeje drasty inspirěrować dali a tradicionelne mustry za swójske naćiski wužili. Lěćna kolekcija wobsteji ze 40 modelow za žony a muži. Projekt stej tež Domowina a Załožba za serbski lud podpěrałoj.
Pomoc Domowiny woporam wulkeje wody
Po informacijach jednaćela Domowiny Bjarnata Cyža podpěra Domowina wopory wulkeje wody w Pólskej z pomocnej akciju za město Bogatynia. Jutře připołdnju pojědźe tam pomocny transport z łožemi a kamorami něhdyšeho serbskeho internata. Zo móža tole w Bogatyni nuznje trjebać, je Cyž zašły kónc tydźenja w rozmołwje z potrjechenymi zhonił. Tute zdźěla tykowane chěže su pod wulkej wodu jara ćerpjeli; konkretne plany za restawrowanje pak hišće njepředleža.
Zuletzt aktualisiert: 31. August 2010, 07:55 Uhr