Bogna Korjeńkowa
Bogna Korjeńkowa narodźi so 1965 w Budyšinje. Serbska rěč a kultura słušatej hižo z dźěćatstwa k jeje žiwjenju. Staršej běštaj wobaj wučerjej na serbskej šuli. Doma rěčěše so samozrozumliwje serbsce – a so tež wjele spěwaše.
Maturu złoži Bogna Korjeńkowa na Serbskej rozšěrjenej wyšej šuli w Budyšinje. Po tym studowaše w Lipsku germanistiku. Po statnym pruwowanju dźěłaše wona sama dwě lěće jako wučerka a chórowa nawodnica na Serbskej rozšěrjenej wyšej šuli.
Lubuje hudźbu: Bogna Korjeńkowa
Hižo z lěta 1993 dźěła wona za SERBSKI ROZHŁÓS w Budyšinje. Znata je Bogna Korjeńkowa tež jako redaktorka za regionalny telewiziny magacin MDR SACHSENSPIEGEL, za kotryž dźěła hižo z lěta 1997. Dnja 08. septembra 2001 běše premjera "WUHLADKA". Magacin wusyła so z domu MDR KRAJOWEHO SĆELAKA SAKSKA. Bogna Korjeńkowa moderěruje wusyłanje w swojej maćeršćinje.
Wosebje lubuje rozhłosowa a telewizijowa redaktorka hudźbu. Jako šulerka běše čłonka w šulskim ansamblu, spěwaše w komornym chórje Budyskeje hudźbneje šule a wukny na wiolinu hrać. Pozdźišo skutkowaše Bogna Korjeńkowa w serbskim studentskim chórje sobu, kotryž tež tři lěta dołho nawjedowaše. Po studiju spěwaše w Radworskim chórje Meja sobu a běše nawodnica Chrósčanskeho cyrkwinskeho chóra.
WUHLADKO – moderatorka bydli z mandźelskim Matejom a dwěmaj dźowkomaj w Pančicach-Kukowje. W swobodnym času wočerstwi so žurnalistka při jara njewšědnym hobbyju: wona restawruje wosebje rady historiske meble z wokoliny.