Šoferki a šoferojo awtow kedźbu! Jězbne dowolnosće zhubja swoju płaćiwosć

Mnoho šoferow je tele dny chětro znjeměrnjene. Rěč je wo tym, zo wšelake jězbne dowolnosće za něšto dnjow swoju płaćiwosć zhubja. Naš redaktor Tomaš Faska je k tomu informacije zestajił.

Ein „rosa Führerschein“ steckt in einer Geldbörse.
prawa za wobrazy: dpa

Zasadnje je nětko nowe, zo njepłaći tutón wažny dokument hižo wěčnje, kaž bě to dotal. Jězbna dowolnosć tuž jedneho dnja wotběži, w mnohich padach hižo bórze. Najprjedy raz drje to njepotrjechi wšě jězbne dowolnosće, ale, za někotrych wobsedźerjow a wobsedźerki woprawdźe rěka, zo jich papjery hižo 19. januara, potajkim za něšto mało dnjow płaćiwe njejsu.

Pod smužku smě so rjec: Rozsudne je, hdy sy rodźeny a kak stare su „papjery“. Z toho postajił je so tak mjenowany schodźeńkowy plan.
Tak wupada na přikład za dokumenty, wupisane do 1.1.1999:

Dobra powěsć tu najprjedy raz za wšěch, do lěta 1953 rodźenych. Ći maja chwile hač do lěta 2033. Hinak wupada to pola wšěch, kotřiž su rodźeni mjez 1954 a 1958. Jich „flepy“, kaž so praji, su wot lětušeho 20. januara woprawdźe přestarjene. Strach, zo njesmědźa wjac z awtom jězdźić, jeli su termin za wuměnu zapasli, pak potrjecheni měć njetrjebaja, byrnejž su sej dyrbjeli a tež móhli mjeztym dawno nowu tak mjenowanu EU-dowolnosć wobstarać.

Zasadnje pak njepoćahuje so njepłaćiwosć na dowolnosć k jězdźenju, ale jenož na dokument samy. Lepi jich policija, smědźa wězo dale jěć, dyrbja pak pokutu płaćić. Ta je na zbožo hišće poměrnje niska – 10 eurow je warnowanski pjenjez.

Verschiedene Führerscheine
prawa za wobrazy: dpa

Nětko chwatać, zo by so to wobešło, pak zmysł nima. Termin pola zarjada za jězbne dowolnosće dóstanješ jenož online a w Budyšinje na přikład wokomiknje najzašo za spočatk měrca. Mjez 1959 a 1964 rodźeni maja chwile hač do 19. januara 2023, a tak dale. Dalše štaflowanje dyrbi sej kóždy dokładnje wobhladać. Tabulki namakamy na přikład na stronje ADAC (hlej tule) abo časopisa „Autobild“.

______________________________

Tež naši němscy koleginy a kolegojo su so z temu zaběrali a přehlad stworili, što trjebaće wšitko za "nowu" jězbnu dowolnosć:

Eine Grafik zum Thema Führerscheintausch
prawa za wobrazy: MITTELDEUTSCHER RUNDFUNK