Serbski rozhłós pytaše Waše impresije: Moje motorske a ja
Hauptinhalt
06. winowca 2022, 09:20 hodź.
Simson, MZ abo cyle druhe mašiny? Što sće hižo wosebiteho ze swojim motorskim dožiwili, dokal sće sej z nim dojěli? Sće skerje přiwisnicy NDR-skich mopedow abo lubujeće radšo wjetše wukrajne mašiny?
Rejza Handrikowa z Róžanta je jedna z tych Serbowkow, kotraž so na sylne mašiny sydnje a z nimi po kraju smali. Hižo jako dźěćo wo tym sonješe. Moped wšak je hižo znała, tež jězdźiła. Ale motorske je tola něšto hinaše. A tak dźěše cyle spěšnje. Foto při motorskim a to w narodnej drasće – pohladajće raz!
Dalša rjana impresija je dóšła nam wot Jana Nuka. Wón piše: "Moja Panonija, kotruž je mój njeboh bratr w lěće 1961 kupił. Po tym, zo je wón w samsnym lěće do zapada wupućował, su moje starše sotry Hilža a Zala z motorskim jězdźili."
Na motorskim dožiwiš njewšědne wěcy a tež fanojo su druhdy tróšku njewšědne a lubuja přewšo swoje mašiny. Architekt Marko Dźisławk je tajke přez swoje dźěło zeznał:
Lea Kralec je rady z nanom po puću – z motorskim smalitaj po Łužicy, wosebje woblubowana čara je "Serbski Highway". Wutrobny dźak za rjane impresije!
Jedna lubowarka motorskich, kotraž je swój hobby k powołanju sčiniła, je Andrea Thielec, kotraž nětko w Mnichowje bydli. Wona dźěła w marketingu za wulku němsku firmu, kiž motorske twari. Hižo jako młoda holca je započała so horić za mašiny. Dowol syda pola njeje jenož z motorskim, wšojedne hdźe.
A to su za nju njezapomnite wokomiki, kaž praji. A kaž so za tajku specialistku za motorske słuša, je tež cyle spěšnje po puću. Na přikład na wubědźowanskich čarach. Při kóždym kole nawuknješ, kak móžeš to abo tamne hinak činić, tak zo sy spěšniši, Andrea Thielec praji. Jeli nima wona bencin w kreji – potom tež njewěmy. Hač z Enduro přez krajinu abo ze spěšnjej mašinu po čarje abo jednorje na puću - wšo to wona wobknježi.
Dalši wulki fan motorskich a mopedow je Jan Tejpel, nětko bydlacy w Delnjej Kinje. Swój młodźinski čas je wón dožiwił, kaž zawěsće mnozy z nas – z mopedom pod riću. Wón je jako młodźenc hižo mašiny reparował, jeli njejsu wjace jěli. Wšelake modely je potom jako młodostny měł, a tež dźensa hišće wjacore mopedy a motorske ma. Zwjetša modely, kiž su hižo wjacore lětdźesatki stare – a wšitke tute su derje hladane. To rěka pak tež, zo dyrbi prawidłownje na čaporowych wikach abo tež w syći za prawymi dźělemi pytać.
Tež Mathias Kupka z Ralbic je nam swoje impresije zapósłał. Pohladajće raz!
Chrystof Cyž, nětko bydlacy w Drježdźanach, je so hižo jako młodostny za mopedy zajimował. Ale jednoho dnja je sej wuhladał wosebity model: Duo, potajkim móhłrjec wariantu łastojčki, w kotrejž móžetaj dwajo sedźeć a kiž jenož z rukomaj wodźiš. Sobušulerka je jemu powědała, zo doma tajki stejo maja. Na to je z nanom sobušulerki porěčał a sej staru korejtu kupił a wjele prócy do njeje tykał. Najprjedy raz je hladał, zo korejta scyła zaso jědźe a potom je Chrystof Cyž ju hišće kusk po kusku ponowił. Samo płat je sej zešić dał, kiž třěchu zakryje. Dale je Chrystof Cyž blachi dyrbjał z blakami zaso hromadźe skołać, dokelž běchu torhnjene. Nětko pak najskerje kóždy dźěl tutoho wosebiteho motorskeho znaje. A je samo hižo chětro požadany, tutón Duo. Zasadnje pak Chrystof Cyž swój lubowany Duo nikomu njewupožči, za to je přewjele hodźinow do njeho inwestował, tak praji.
