Powěsće za dźěći: sobotu, dnja 16.10.2021
Hauptinhalt
Jako prěnje móžu wam rjec, zo njetrjebaće so w nazymskich prózdninach dale doma testować dać, jeli-zo chceće so na někajkich prózdninskich poskitkach wobdźělić. Kaž je kultusowy minister Christian Piwarz rjekł, njeby tole w praksy móžne było. Tak płaći za dźěći hač do 17 lět, zo njetrjebaja pola zarjadowanjow abo w hosćencach test předpołožić. Informujće pak so přiwšěm prjed hač startujeće do kupjele abo na přikład do prózdninskeho campa hišće raz pola zarjadowarja. Jeli mjenujcy tola test trjebaće, je tajki za was darmo!
Što da móžeće wšo dožiwić? Podamy so najprjedy raz do přirody. Jeli docyła hišće njewěsće, što přichodny tydźeń worać, móžeće so dźensa a jutře hišće za tydźenski camp w Koporcach abo Mikowje přizjewić. W Koporcach zeznajeće haty, wobkedźbujeće ptački a skót kołowokoło a móžeće wšědnje z profijom wudźić. W Mikowje dźe cyły tydźeń do lěsa. Sće z hajnikom po puću, čitaće slědy a dožiwiće dyrdomdeje. Wobaj poskitkaj płaćitej 50 eurow a přizjewić móžeće so přez mail pola umweltbildung@foerderverein-oberlausitz.de.
Jeli sće tola bóle za nutřka, potom dojědźće sej tola do Muzeja Zapadneje Łužicy w Kamjencu. Wutoru móžeće wot dwěmaj do na poł štyrjoch na přikład za kulisy pohladać, kak slědźerjo mortwe zwěrjata wutykaja a štwórtk w samsnym času dźe do wosebiteje wustajeńcy a do doby jako hišće sawrijery před durjemi płuwachu. Tikety móžeće sej online na stronje www.museum-westlausitz.de skazać.
A naposledk hišće info za wšěch tych, kiž chcychu so spontanje hišće na paslenskim dnju w Don Boskowym domje we Worklecach wobdźělić. Wottam su zdźělili, zo su wšitke terminy na nowy tydźeń kompletnje wuknihowane a zo so tam njetrjebaće wjace přizjewić.
Cyle na kóncu wězo pokiw, kiž so stajnje hodźi: pak zmija pušćeć, kastanije a žołdźe za hajnika zběrać abo tola raz do Biskopic do zwěrjenca abo do, Wojerec abo Korzymja kupać jěć - to budźe ći wjeselo!
