Weronika Zahrodnikowa - nowa hudźbna produkcija Serbskeho rozhłosa

Weronika Zahrodnikowa - nowa hudźbna produkcija II
prawa za wobrazy: Clemens Schmidt/MDR

Znajeće hižo nowu produkciju Serbskeho rozhłosa, kiž smy njedawno w Drježdźanskim studiju z Andreasom Goldmannom produkowali? Titul rěka "Mojej ruce" a hłós spěwarki je wam zawěsće znaty. Weronika Rachelic, nětko Zahrodnikowa, je interpretka titula.

A zajimawe tež je, kak je so jeje wid na hudźbu změnił. Zeznali sće ju zawěsće za čas Europeady 2012 we Łužicy. Tehdy je wona hit "Bala, bala, bala - tak spěwa Łužica" spěwała. Kaž je nam w interviewje přeradźiła, je tež Weronika Zahrodnikowa jako młoda holca wo tym soniła, so raz z profesionelnej spěwarku stać:

Haj wězo. Tehdy běše mój wulki són, we wulkich mjezynarodnych musicalach sobuskutkować. A na přikład raz w Hamburgu na jewišću sobu spěwać. Wosebje musical "Der König der Löwen" je mje přeco přewodźał. Hišće dźensa sej jón rady naposkam. Tola sym dowidźała, zo je raz dypk přišoł, hdźež njemóžeš wjace telko z hudźbu zasłužić, zo móžeš wot toho žiwy być. Tak sym sej nowe wužadanja pytała. Bórze chcu swój studij na polu hladanskeho managementa zakónčić.

Dale je nam Weronika Zahrodnikowa přeradźiła, kotru serbsku hudźbu wona tež rady priwatnje poska:

To je wšelako. Album skupiny Wusmuž dźensa hišće chětro husto sej naposkam. Dale so mi na přikład projekt Donatec bratrow z Chrósćic jara lubi. Wšojedne, hdźe štyrjo bratřa pod mjenom "Holaski" wustupja a zahudźa, tam knježi přeco dobra nalada. Dale sćěhuju tež kóždu póndźelu młodźinskemu wusyłanju Radija Satkule. To je za mnje přeco kruty termin! A hudźbje, kiž so tam hraje, tež wot młodych serbskich talentow, rady sćěhuju!

Tule móžeće sej nětko jeje nowy hit "Mojej ruce" naposkać a tež składować.

Weronika Zahrodnikowa - nowa hudźbna produkcija 3 mjeń.
prawa za wobrazy: Clemens Schmidt/MDR

Hač serbski klasikar abo nowy hit. Tule namakaće dalšu hudźbu, kiž móžeće sej na swojich smartfonach abo na ličaku składować - a tak přeco zaso naposkać.