Rěčny kućik z dr. Janu Šołćinej, 10.06.2020 Serbska rěč so wuwiwa – Rěčny kućik

22. smažnika 2011, 08:39 hodź.

Mjechki lód?

„Mjechki lód na předań" - tutu informaciju čitach njedawno w serbskorěčnych socialnych medijach. Chwilku přemyslowach. Wabjenje bě pak z wotpowědnej ilustraciju wuhotowane, a tuž spěšnje zapřimnych, zo bě měnjena družina, kotruž němsce „Softeis" pomjenujemy. Runje w nalěću a lěću damy sej wšelakore družiny woneje chłóšćenki zesłodźeć, za kotrež so w dwurěčnych słownikach tež po přikładźe čěšćiny tworjene pomjenowanje zmjerzlina poda. Hinak hač lód, kiž so we formje kulow předawa, ma lód z pomjenowanjom „Softeis" hinašu konsistencu. Tež we „wikipediji" so wón jako „wosebje mjechka družina" wopisuje. Mjechki lód je mjeztym tež w „soblexu" zapisany. Přepytowanje w tekstowym korpusu je pak pokazało, zo so pomjenowanje w rěčnej praksy dotal etablěrowało njeje. Wužiwamy w hornjoserbšćiny dalše požčonki kaž na př. softdrink abo softrock, a tohodla bych tež pomjenowanje softlód akceptowała. Tuž lubi słucharjo, njech Wam lód zesłodźi - wšojedne, hač kulowy, kulkaty, mjechki lód abo tež softlód.

Dieses Thema im Programm: 27. März 2019 | 05:15 Uhr