Rěčny kućik z wusyłanja 18.01.2006 Dodatne wuhotowanje

25. wulkeho róžka 2006, 10:48 hodź.

Rěčny kućik dr. Jany Šołćineje Tema: Dodatne wuhotowanje

Praji so, zo je to kajkosć mužow, zo swoje awta nastajnosći rjedźa a tež přeco po najmodernišej technice wuhotuja. Njewěm drje, hač tole trjechi – ale přiwobroću so rěčewědnemu problemej, kotryž z awtami zwisuje. Do awtow, kotrež njejsu moderne typy, móžeš tež pozdźišo hišće wěste dźěle abo připrawy zatwarić, němsce so tomu praji "etwas nachrüsten". Serbsce bych prajiła, zo so awto "dodatnje wuhotuje", na přikład z klimowej připrawu resp. z klimatizaciju. Aktualne je tež žadanje za "dodatnym wuhotowanjom awta z filtrom", kiž njeda tež najmjeńšim partiklam do powětra. Wězo móžemy tež cyle jednorje prajić, zo so něšto do awta "zatwari", něšto "při-" abo "přetwari". Tole móžemy tež z kompjuterom, tež wón hodźi so dodatnje hišće wuhotować.
Lěpšina dodatneho wuhotowanja je ta, zo je wona tuńša hač kup noweho awta, kompjutera abo druheje twory!