Regionalnej portalej: Poskitki dźěłowych a wukubłanskich městnow

Portal WSWSCOUT.de a přehlad Załožby za Serbski lud - wupisanje dźěłowych městnow
prawa za wobrazy: WSWSCOUT.de

Hišće hač do kónca lěta poskića město Běła Woda tak mjenowane wirtuelne wiki. A to na internetowej stronje: wswscout.de. Tam njenamakaja zajimcy nic jenož dźěłowe, ale tež wukubłanske městna. Na přikład pytaja w rjemjeslniskej branši instalaterow, twarcow za tepjenja, monterow, elektrikarjow – a poskića so na přikład tež wukubłanje na rěznika. Nimo rjemjesła, pytaja pak so tež ludźo za administratiwne dźěła, inženjerojo abo inženjerki. Repertoire poskitkow je potajkim chětro mnohostronski.

Nastał je portal w zwisku z tak mjenowanymi "zetkanjemi nawrótnikow", němsce “Rückkehrertreffen”. Tute wšak so přeco kónc lěta mjez hodami a nowym lětom přewjedu – potajkim w času, hdźež je wulki dźěl ludźi zwonka Łužicy tež zaso na wopyće w domiznje. A wosebje za tych, kiž chcedźa so eksplicitnje tu zaso nawróćić, na přikład ludźo, kiž pochadźeja z Běłeje Wody, za tych je tajki portal wězo wulka lěpšina. Wšako namakaja tam hnydom přehlad regionalnych poskitkow. Dalši plus: zajimcy móža so hnydom na tutej stronje z potencielnymi dźěłodawarjemi w našim regionje skontaktować.

Nětko njebydli wjetšina našich připosłucharjow a připosłucharkow runje w Zhorjelskim regionje blisko Běłeje Wody, ale wokoło Budyšina, Wojerec a Kamjenca. Njeby tajki centralny portal tež něšto za naš region był? Jeničce w serbskich institucijach wšak so dźěło hižo kopi a je zdobom telko njewobsadźenych městnow, zo by so tajki portal wudanił.

A tež klětu spočatk lěta změja tam někotre swobodne městna. Tak pyta Załožba za serbski lud tuchwilu někoho za marketing a zjawnostne dźěło w swojim wotrjedźe w Choćebuzu. Dale wupisane je městno sobodźěłaćerka/sobudźěłarki za wobdźěłanje spěchowanskich próstwow – za tute móžeće so hač do kónca januara požadać. A Załožba změje klětu dalše swobodne městno w zwisku z wulkim projektom nowotwara na Lawskim arealu w Budyšinje. Tež za wobhospodarjenje pjenjez za strukturnu změnu někoho trjebaja.

Ludowe nakładnistwo Domowina je wupisało městno korektora/korektorki za Serbske Nowiny. Wone ma so wot měrca abo ručež móžno wobsadźić, za to móžeće so dale požadać. Dale pyta nakładnistwo marketingoweho managera – to je poł městna – a wolontarske městno pola Serbskich Nowin ma so wobsadźić.

Domowina je móhła swój zarjad w zašłych lětach chětro womłodźić. We wšelakich wobłukach pak dale ludźi pytaja, tak jednaćel Marko Kowar. Nimo toho chce Domowina dalšich tak mjenowanych motiwatorow za rewitalizaciju rěče zasadźić. Dweju tajkeju tuchwilu maja, na sydom móhli to raz być, tak Kowar.

Serbski ludowy ansambl pyta techniskeho nawodu a tež zasadnje technikarjow za swěcu a zwuk. Němsko-Serbske ludowe dźiwadło trjeba ludźi za wopytowarski serwis a gastronomiju.

To dobre: eksistuje přehlad wšěch tutych dźěłowych a wukubłanskich městnow w serbskich institucijach. Jón namakaće na internetowej stronje Załožby tule.

Portal WSWSCOUT.de a přehlad Załožby za Serbski lud - wupisanje dźěłowych městnow
prawa za wobrazy: MDR

Apropos dźěłowe poskitki w Serbach: Tež Serbski rozhłós a telewizijny magacin WUHLADKO wjeselitej so wězo přez angažowanych młodych ludźi, kiž chcedźa ze zajimom serbski program sobu wuhotować. Čakaja na Was wužadanja kaž moderacije a zhotowjenje přinoškow. Za to trjebaće dobre znajomosće serbšćiny. Jeli žane žurnalistiske zakłady nimaće, potom Wam tute tu pola nas sposrědkujemy.

MDR Serbski rozhłós - nowe studijo, neues MDR-Studio Bautzen
prawa za wobrazy: Clemens Schmidt/MDR