Rańše powěsće: wutoru, 06.03.2018


Dźěłarnja za přichod Łužicy

Wjacore gmejny su hromadźe stworili projektowy cyłk "Dźěłarnja za přichod Łužicy" - kiž je so wčera prěni raz zetkał. Hač do lěta 2020 dyrbi so koncept za dalše wuwiće Łužicy stworić. Wažne dypki su mjez druhim energijowa eficientnosć, mobilita, digitalizacija, wobswětoškit a turizm. Projekt so spěchuje ze sydom milionami eurami, kiž staja so wot Sakskeje, Braniborskeje a wot zwjazka k dispoziciji.


Wobraz Budyšina do přichoda

Diskusija wo wobraz přichoda města Budyšin je zahajena. Z nowym wobrazom přichoda chce město zhromadnje z Budyšanami diskutować, što wučini Budysku identitu. Měsće so tuchwilu jara derje dźe, ludźo pak to zdźěla hišće spóznali njejsu, štož měło so změnić. To rjekny Budyski wyši měšćanosta Alexander Ahrens na nowinarskej konferency. W přichodnych měsacach ma so rjad zjawnych diskusijow na wšelake temy přewjesć - mjez druhim spočatk junija w Serbskim domje wo kulturje a Serbach. Nowy wobraz přichoda ma so nadźěłać, dokelž tuchwilny jenož hišće hač do 2020 płaći. Wobraz přichoda je ideelna směrnica za dźěławosć měšćanskeje rady a zarjadow.


Labyrinth jutry zaso wotewri

Po wohenju w zachodnym twarjenju labyrinta w Małym Wjelkowje planuje mějićelka dale, park jutry zaso wotewrić. Za to dyrbja hišće prózdny kiosk na imbis a wobchod přetwarić. Njedźelu je w Dźiwadle na hrodźe beneficne zarjadowanje ze wšelakimi wuměłcami, kiž chcedźa z tym znowanatwar podpěrać. Zachodne twarjenje labyrinta bě so spočatk januara wotpaliło. Policija tuka na to, zo su paduši je zapalili, po tym, zo běchu so tam zadobyli.


Hłownje žony maja minijoby

Dźěłowe městna z podźělnym časom a tak mjenowane minijoby w Hornjej Łužicy zwjetša žony wobsadźa. Kaž dźěłarnistwo za zežiwjenje a hosćency NGG składnostnje Mjezynarodneho dnja žonow w tutym tydźenju zdźěli, wučinja podźěl žonow na tajkich dźěłowych městnach w Budyskim wokrjesu 75 procentow. Wosebje w hotelach, hosćencach a pjekarnjach je to jara rozšěrjene. Šansy na karjeru a powołanske dalewuwiće pak su w tajkich dźěłowych poměrach skerje snadne, dźěłarnistwo kritizuje.


Wědomostna monografija k tworjenju Kita Lorenca wušła

Wědomostna monografija k tworjenju Kita Lorenca je w Ludowym nakładnistwje Domowina wušła. Spisał je ju Regensburgski slawist Walter Koschmal z titulom „Der Dichter - Kito Lorenc - dazwischen". Wón analyzuje tworićelske wuwiće basnika po chronologiji jeho twórbow. Lorenc basnješe serbsce a němsce a tworješe wosebitu estetiku mjez woběmaj rěčomaj, literaturomaj a kulturomaj. Wón přełožowaše, pisaše a wudawaše wědomostne a literarne twórby. W słowje bě Kito Lorenc doma, chutnje a ironisce, nutrnje a pryzlojće. Knižna premjera je na sympoziju „Kito Lorenc, basnik a literarny wědomostnik" za dwaj tydźenjej.


Budyska lokomotiwa je předata

Lokomotiwa, kotraž steješe wjele lět před Budyskim dwórnišćom, słuša nětko oficielnje towarstwu Wuchodosakskich přećelow železnicy. Němska železnica je wčera papjery lokomotiwy přepodała. Přetwara dwórnišća dla njemóžeše tuta na starym městnje wostać. Wobydlerjo města běchu so za wuchowanje techniskeho pomnika zasadźili. Parna lokomotiwa steji nětko na tamnym boku dwórnišća.

posledni raz aktualizowane: 06. nalětnika 2018, 08:22 hodź.