Rańše powěsće: srjedu, 07.03.2018


Radebeul: Myto Tilichej

Bywši ministerski prezident Sakskeje, Stanisław Tilich, je wčera w Radebeulu čestne myto zjednoćenstwa Sakskeho hospodarstwa dóstał. Tilich je tomu přinošował, zo je Sakska dźensa po cyłej Němskej a we wukraju připóznate hospodarske městno, rěka w rozsudźe jury. Myto je z 10.000 eurami dotěrowane a je za towarstwa myslene. Pjenjezy dóstanu dźěćacy hospic w Lipsku, towarstwo, kiž ponowja cyrkej we Łutach a klóšter Marijina Hwězda w Pančicach-Kukowje.


Slepo: Wšitko po planje

Twarske dźěła při Němsko-Serbskim šulskim centrumje w Slepom pokročuja tež w zymje po planje. Wo tym informowaše Steffen Seidlich wot twarskeho zarjada wčera gmejnskich radźićelow w Slepom. Tak dyrbjachu wjedra dla dotal jenož jedyn tydźeń přestawki zapołožić. Přiwšěm pak su wšitke twarske dźěła derje mjezsobu koordinowane, Seidlich doda. Kónc 2019 ma šulski centrum hotowy być.


Budyšin: Historiska žurla nimale dotwarjena

Budyska historiska žurla radnicy so runje dotwari. Kaž praji nowinski rěčnik André Wucht, so rumnosć přichodnu wutoru zjawnosći prezentuje. Potom maja zbytne dźěła zakónčene a technika zatwarjena być. Při ponowjenju su nadešli originalnje pomolowany wjerch. Tohodla su dźěła dlěje trali hač planowane. Dotal liča z tym, zo płaći ponowjenje 90.000 eurow. Mjez druhim so rumnosć za posedźenja wuběrkow Budyskeje měšćanskeje rady wužiwa.


Gmejny: Přidatne pjenjezy komunam

Wjacori serbscy wjesnjanosća so přez připowědźenje wjesela, zo chce Sakska komunam přidatne pjenjezy dać. Měnja pak, zo to w cyłku njedosaha. Skerje měli so powšitkowne krajne přiražki dołhodobnje zwyšić. Ministerski prezident Sakskeje Michael Kretschmer je kónc januara připowědźił, zo dóstanu mjeńše gmejny w přichodnych třoch lětach přidatnje 70.000 eurow wob lěto wot kraja. Jeničke wuměnjenje je, zo so 60 procentow pjenjez inwestuje. Na wokrjes pak gmejny ničo wotedać njetrjebaja. Hišće lětsa ma so prěni dźěl pjenjez wupłaćić.


Budyšin: Digitalny archiw

Wot nětka su wjace hač 3000 wopismow Budyskeho měsćanskeho archiwa z časa mjez 1248 a 1581 přez internetowy wopismowy archiw "Monasterium" přistupne. Tute buchu w lěće 2011 digitalizowane a potom krok po kroku wot historikarjow přeslědźene. Lětsa ma so hišće 1600 wopismow přidružić. "Monasterium" je po cyłym swěće najwjetši wirtuelny archiw wopismow. Dotal wobsahuje na poł miliona dokumentow ze 60 institucijow z dźesać europskich krajow.

posledni raz aktualizowane: 07. nalětnika 2018, 08:53 hodź.