Rańše powěsće: póndźelu, 12.03.2018


"Jednota" połna dźěći a staršich

Na 250 staršich a dźěći je wčera popołdnju do Chrósćic na serbske swójbne popołdnju přišło. Tute je Rěčny centrum Witaj zhromadnje ze župu "Michał Hórnik" hižo wosmy króć zarjadował. Hłowna naležnosć popołdnja je, zo so dźěći a starši při zabawje a bjesadźe w serbskej atmosferje zetkaja.


Pawk w Berlinje

Kónc tydźenja běchu štyrjo zastupjerjo młodźinskeho towarstwa Pawk zhromadnje z młodostnymi mjeńšinow hraničneje kónčiny Němskeje a Danskeje w Berlinje po puću. W srjedźišću steješe wosebje hromadźenje podpismow za iniciatiwu Minority Safepack a mjezsobna wuměna. Tak zhoni cyłkownje 20 młodostnych něšto wo němskej mjeńšino-politiskej strukturje a organizacijach, kiž so w njej angažuja.


Hłowna župy "Delnja Łužica"

Župa "Delnja Łužica" chce so w přichodźe wo lěpše zwiski k tamnišim gmejnam a towarstwam prócować. Wosebje chce wona młodych ludźi za studij wučerstwa na serbšćinu mobilizować. To je wuslědk diskusije na zašłej hłownej zhromadźiznje w Depsku. Dale wuzběhny župan Wylem Janhoefer dobre młodźinske kulturne dźěło na wsach. W lětnej bilancy wón wozjewi, zo přisłuša tuchwilu 39 Domowinskich skupinow a 24 towarstwow župje. Dohromady maja na 2.400 čłonow.


Jutrowne wiki we Wojerecach

We Wojerowskej Łužiskej hali su so kónc tydźenja znowa jutrowne wiki wotměli. Wo wobrubjenje a kulturny program postaraštej so sobotu mjez druhim Serbska rejowanska skupina z Brětneje a Delnjoserbski dźěćacy a młodźinski ansambl. Wčera pokaza rejowanska skupina ze Smjerdźaceje wurězki ze swojeho repertoira a spěwotworc Bernd Pittkunings předstaji program z dźěćimi. Nimo fachowcow, kiž prezentowachu swoje kolekcije, móžachu wopytowarjo tež sami jejka debić. Jutrowne wiki wotměchu so mjeztym k 24. razej.


Dźak a podpěra

Krollec mandźelskaj, kiž wobsedźitaj zahrodkarnju we Wudworju, staj sobotu Smječkečanskej wohnjowej woborje 600 eurow přepodałoj. Je to dobytk čaporowych wikow, kiž staj srjedź januara we Wudworju wuhotowałoj. Z tym chcetaj so pola wohnjoweje wobory ze susodneje wsy za pomoc při lońšej wulkej wodźe podźakować. Wobornicy ze Smječkec podpěruja z darom dorost a so z hólcami a holcami do treningoweho campa podadźa.


Chór Budyšin so na jutry hotuje

Kónc tydźenja je chór Budyšin w Ochranowje swoje chórowe lěhwo přewjedł. Čłonojo njejsu jenož swój repertoire skrućili, ale tež na spěwach oratorija "Nalěćo" dźěłali. Tute zaklinča sobotu do jutrow na koncerće w Budyskim Serbskim muzeju. Dirigent chóra Budyšin je Michał Janca. Nimo probow su sej tež Ochranowski muzej narodopisa wobhladali.


Nowaj mužej w Chrósćicach

Prěnje koparske mustwo sportoweje jednotki Chrósćicy ma noweju hrajerjow. Na poziciji wrotarja budźe Chróšćanam 24-lětny Oliver Stein wupomhać, dokelž je Matej Cyž zranjeny a dokelž Petr Kraliček čerwjeneje karty dla hišće někotre hry hrać njesmě. Nowy nadběhowar rěka Tomaš Polivka. Čech je wot sportoweho towarstwa TJ Doksy do Chrósćic změnił a sobotu hižo prěni raz za zastupjerja krajneje klasy trjechił.

posledni raz aktualizowane: 12. nalětnika 2018, 09:53 hodź.