Powěsće: póndźelu, 09.04.2018


Slepo - Za strukturnu změnu

W Slepom a Rownom je wčera 120 ludźi za to demonstrowało, zo by so Wochožanska jama pomjeńšiła. Łužiski zwjazk z mjenom "Strukturna změna nětko" bě k tomu přeprosył. Ze symboliskej čerwjenej smuhu pokazachu na to, hdźe měło so wudobywanje brunicy skónčić, zo by žiwjenje na wsach při hranicy jamy hišće hódne było. Na druhej stronje demonstrowachu mjez druhim tójšto wobydlerjow Miłoraza za spěšne přesydlenje, dokelž njewěsty přichod a stajny bój dlěje nochcedźa.


Budyšin - Paradiz je dohraty

Na hłownym jewišću Němsko-Serbskeho ludoweho dźiwadła su sobotu serbsku inscenaciju „Paradiz w dobrej stwě" k šestemu a zdobom poslednemu razej předstajili. Wjace hač 1.050 přihladowarjow je sej ju w šesć předstajenjach wobhladało, telko kaž w zašłych třoch lětach nic. Před 21 lětami, jako bu hra Markusa Köbelija k prěnjemu razej pod titulom „Holcerec peepshow" inscenowana, bě ju 300 ludźi mjenje wopytało. Wosebitostka bě, zo bě serbske dźiwadło składnostnje swojich 70. narodnin skupinu lajskich hrajerjow jako sobuskutkowacych zdobyło, kotřiž předstajachu turistow z cyłeho swěta. Wot nazymy so hra w němskej rěči předstaja.


Mały Wjelkow - Ma nowu lěkarku

Lěkarska praksa w Małym Wjelkowje je wot dźensnišeho zaso wobsadźena. Ju je přewzała dr. Anna Reichowa z Budyšina. Dotal běše wona lěkarka w praksy Tomaša Brycki w Kubšicach. Lěkarska praksa we Wětrowje pak je dale njewobsadźena. Kaž nam wjesnjanosta Stanij Ryćer w Bóšicach zdźěli, je Wětrowska praksa kompletnje wuhotowana a lěkar njetrjebał tež žanu podruž płaćić.


Hornja Łužica - Wulke swójbne swjedźenje

W Kulowskej katolskej wosadźe je Zhorjelski biskop Wolfgang Ipolt wčera sakrament firmowanja wudźělił. Mjez 32 firmujomnymi bě tež dźewjeć družkow. W Ralbicach a Radworju pak su wčera dźěći k 1. swjatemu woprawjenju šli. W Radworju bě jich na serbskich kemšach 12 a na němskich šěsć prěnjowoprawjenskich dźěći. W Ralbicach dźěše 18 dźěći k 1. swjatemu woprawjenju. Wšitke holcy běchu runje tak kaž w Radworju w družčej drasće.


Wodowe Hendrichecy - Třidnjowska olympiada

W Žitawskich horinach zahaji so dźensa dopołdnja 52. olympiada serbšćiny. Za třidnjowske wubědźowanje we Wodowych Hendrichecach je so 64 šulerjow 6. lětnikow přizjewiło, kotřiž přińdu z dźesać šulow Hornjeje a Delnjeje Łužicy. Wo nich staraja so serbscy wučerjo a wučerki a 13 studentow wučerstwa. Nawodnicy lětušeje olympiady stej Marlis Młynkowa wot Serbskeho šulskeho towarstwa a wučerka Milenka Ertlowa z Radworja. Prěnja tajka olympiada serbskeje rěče wotmě so w lěće 1966.


Budyšin - Nowy štom wosrjedź města

Na Budyskim Hłownym torhošću při Tachantskej cyrkwi ma so dźensa dopołdnja tak mjenowany Krabatowy štom woponow postajić. Na nim budu wopony wšitkich městow, gmejnow a towarstwow přičinjene, kotrež přisłušeja Krabatowemu regionej. Po lěće 1672 bydleše Chorwat Johann von Schadowitz dwě lěće jako wosobinski adjutant sakskeho kurwjercha Jana Jurja III. na Budyskim hrodźe. Pozdźišo bu wón jako serbska bajowa postawa znaty. Přichodnu njedźelu dožiwi Budyski hród cyłodnjowski Krabatowy swjedźeń.

posledni raz aktualizowane: 10. jutrownika 2018, 09:24 hodź.