Powěsće: wutoru, 10.04.2018


Bukecy - Cyrkwinsku wěžu ponowjeja

W Bukecach wot dźensnišeho twarnišćo za wobšěrne ponowjenje cyrkwineje wěže přihotuja. Kaž farar Thomas Haenchen zdźěli, ma zaroštowanje hač do meje trać. Při tym dyrbja tež připrawu za mobilnu telefonowu syć a warnowansku swěcu za lětadła wobkedźbować. W juniju maja ćěslojo hrjady wuměnić, w kotrychž běchu hrib namakali. Nimo toho so hawba wěže znowa z koporom pokryje, špica dóstanje nowe pozłoćenje a fasadu nowu pomoluja. Twarske dźěła maja hač do kónca oktobra trać.


Hornja Łužica - Hromak rosće

Na Łužiskich polach so hromak nětko z pjeršću a folijemi zakrywa. Z tym ma so rostlina krótko do žnjow z dosć ćopłotu zastarać, kotruž trjeba, zo by dorostła. Ratar Michał Domanja z Hózka wočakuje prěnje žně hromaka kaž kóžde lěto kónc apryla. Hromak, kotryž so hižo nětko předawa, bu z rołami pod rostlinami wohrěwany.


Hamor - Liča z pomocu policije

Hamorska gmejnska rada chce po najnowšich padach wandalizma, při Bjerwałdskim jězorje wěstotne naprawy zeslynić. K tomu chce gmejna policiju wo podpěru prosyć a mysli na stajnu patrulju policije, tak Roman Krautz wot gmejnskeho zarjada. Zašły kónctydźenja běchu njeznaći parkowanskej awtomataj wobškodźili.


Chór Budyšin ma nowe předsydstwo

Někak 30 čłonow a z tym nimale cyły Chór Budyšin je wčera dotalnu předsydku Janinu Krygarjowu znowa wuzwolił. Za pjeć městnow w předsydstwje je so sydom kandidatow k wólbam stajiło. Nimo Sylwije Jancyneje a Ilki Hauswald, přesadźištaj so nowaj čłonaj w předsydstwje Robert Lorenz a Anne Pawolski. Lětsa planuje Chór Budyšin nimo tradicionalneho nazymskeho koncerta, wustup na horje Čornobóh a hodowne spěwanje w Drježdźanach.


Njebjelčicy - Wjeska so prezentuje

Gmejna Njebjelčicy pokaza so za dwě njedźeli na prěnim mjezynarodnym swjedźenju wsow we wuměłskej wsy Gostewitz blisko Riesy. Towarstwo "Dožiwjenske wsy" ("Erlebnisdörfer e.V.") woswjeći tam swoje 5-lětne wobstaće a je sebi k tomu hosći z Čěskeje, Pólskeje, Awstriskeje, Słowjenskeje, Běłoruskeje a Němskeje přeprosyło, kiž předstaja swoje wsy a žiwjenje na kraju. Mjez druhim změja tam rjemjesła z wšelakorych regionow. Gmejna Njebjelčicy kaž tež Serbska rejowanska skupina Smjerdźaca budźetej w Gostewitzu 20.- 22.aprila serbsku kulturu prezentować.

posledni raz aktualizowane: 10. jutrownika 2018, 09:24 hodź.