Powěsće: póndźelu, 16.04.2018


Budyšin: Krabat ludźi přiwabił

Na wčerawši 17. Krabatowy swjedźeń na Budyskim hrodźe je wjacore sta ludźi přišło. Zhromadnje z Krabatowym towarstwom a Budyskim towarstwom za turizm běchu tež Serbski muzej, Němsko-Serbske ludowe dźiwadło a wyše zarjadniske sudnistwo na njedźelniši program pod motom "Krabat w Budyšinje" prosyli. Z finisažu zakónčichu wustajeńcu "Krabat. Muž. Mytos. Marka." w Serbskim muzeju. Cyłkownje 18 programowych dypkow so hosćom kołowokoło hrodu skićachu. Klětu wotměje so swjedźeń w Chorwatskej.


Wojerecy: Swjedźenske dny hudźby zahajene

Z koncertom Noweje Łužiskeje filharmonije we Łužiskej hali buchu wčera w přitomnosći sakskeho ministerskeho prezidenta Michaela Kretschmera a dalšich prominentnych hosći 53. Wojerowske swjedźenske dny hudźby zahajene. Zdobom přepoda wyši měšćanosta šulerjej na trompeće Gustavej Hentges z Bukec čestne myto Wojerec za wuznamny wuslědk při njedawnym regionalnym wubědźowanju "Młodźina hudźi". Nowu fanfaru za hudźbny festiwal bě Budyski komponist Jan Cyž na serbskej ludowej motiwaj spisał. Hač do spočatka meje je dohromady dwanaće koncertow wšelakich hudźbnych směrow. Mjez nimi stej tež zarjadowani ze serbskim pozadkom: Serbski ludowy ansambl předstaji kónc apryla bajku "Překlepana liška" a štwórtk je literarno-hudźbny program ze serbskimi ludowymi spěwami, basnjemi a hudźbu serbskich komponistow.


Nuknica: Literatura młodźinu zahoriła

W Nukničanskej barace su sobotu wjacori awtorojo swoje basnje a powědančka čitali. Na zarjadowanje je 30 ludźi přišło. Třo hosćo su jenož čitanja dla z Waršawy přijěli. Wšitke literarne twórby, kiž su so přednjesli, su z pjera ludźi, kiž su z baraku zwjazani. Temy tekstow běchu poćahi k lubosći, žiwjenju, nabožinje a serbskej rěči. Napadne bě, zo je sej wjele tekstow na ironiske wašnje ze serbšćinu hrajkało. Hudźbnje wobrubiła je zarjadowanje skupina „Boy čert" ze swójskimi serbskimi spěwami. Tutón literarny wječor bě prěni swojeho razu w barace.


Smječkecy/Chrósćicy: Wopomnjeće a ekumena

Z nutrnosću su wčera w Smječkecach 130. posmjertne narodniny a 70. posmjertniny Elsy Brändström woswjećili. Při pomniku před ewangelskej cyrkwju jimaše so tež šwedska konsulka Sakskeje a Saksko-Anhaltskeje, Petra Löschke, słowa. Wona hódnoćeše dźěło chorobneje sotry Brändström za čas 1. Swětoweje wójny. Za čas jeje skutkowanja w Smječkecach bě mjez druhim wosadźe pišćele dariła. Wčera popołdnju je so Smječkečan ewangelska wosada potom z katólskimi wěriwymi w Chrósćicach k ekumeniskemu nyšporej zetkała, kiž wobrubištaj ewangelski chór ze Smječkec a Chróšćan cyrkwinski chór.


Choćebuz: Hudźbne talenty wotkryli

11 hudźbnych cyłkow a solistow z Delnjeje Łužicy je so sobotu na wubědźowanju młodych hudźbnych talentow w Hudźbnej akademiji w Choćebuzu wobdźěliło. Při zarjadowanju Serbskeho ludoweho ansambla stejachu serbski spěw a twórby serbskich komponistow w srjedźišću. Najwjace dypkow, 22 wot 25 móžnych, je akordejonowy duo Jonas a Tiffany Schultchen docpěło. Z 20 dypkami je jury pohódnoćiła trompetarja Tristana Wolfa, spěwarku Jennifer Kretšmarojc a chór Delnjoserbskeho gymnazija. Wubědźowanje za Hornju Łužicu budźe 28. apryla w Budyšinje.


Budyšin: Dźěći so w čitanju wubědźowali

Milan Jurk z Hórkow a Emely Młynkec z Chrósćić staj dobyćerjej na lětušim 14. čitanksim wubědźowanju Rěčneho centruma Witaj. 23 dźěći 3. lětnika bě so sobotu pod hesłom "Knihi su zastupny lisćik do raja fantazije" w Smolerjec kniharni wubědźowało. Jury hódnoćeše maćernorěčne dźěći a tajke, kotrež po koncepće 2plus rěč nawuknu. Šulerjo njemějachu jenož doma přihotowany tekst, ale tež njeznaty tekst před publikumom prezentować.

posledni raz aktualizowane: 16. jutrownika 2018, 10:18 hodź.