Powěsće: wutoru, 05.06.2018


Přichod Budyšin 2030+

Serbšćina jako rěč wšědneho dnja a samozrozumliwy wobstatk zjawneho žiwjenja měła so w Budyšinje rozšěrić. Tute a dalše žadanja a přeća zwurazni na 30 wobdźělnikow wčera na zjawnej diskusiji w Serbskim domje. Bě to prěni z wosom zjawnych forumow, kotrež Sprjewine město nětko w juniju přewjedźe. Při tym maja so namjety, ideje a pokiwy za měšćanski wobraz přichoda Budyšin 2030+ nazběrać, kotryž chce město hišće lětsa schwalić. Přichodny forum wotměje so dźensa na temu swójby a socialne naležnosće.


Pollack nawjeduje wotrjad kulturne wědomosće

W Serbskim instituće nawjeduje wot 1. junija dr. Friedrich Pollack wotrjad kulturnych wědomosćow. Pollack je w Kamjencu wotrostł a w Lipsku stawizny srjedźo- a nowowěka, sociologiju a komunikaciske wědomosće studował. Je doktorat w Serbskim instituće činił, jako wědomostny sobudźěłaćer na TU Drježdźany dźěłał a bu zaso w Serbskim instituće přistajeny. W swojej promociji je so serbskim ewangelskim prědarjam w zažnym nowowěku wěnował. Nowy institutny direktor dr. Hauke Bartels wita, zo je z tym wažne personalne prašenje rozrisane. Po swojim přestrukturěrowanju móže so Serbski institut nětko zaso intensiwnišo na swoje slědźenja koncentrować, tak Bartels.


"Olsenowa cwólba wotleći" w Budyšinje

Na dworje Budyskeho hrodu so tuchwilu kulisy za Budyske dźiwadłowe lěćo natwarja. Z premjeru 14. junija startuje 35 předstajenjow krucha "Olsenowa cwólba wotleći". Madleńka Šołćic wot NSLDź wuzběhnje, zo woswjeća lětsa hnydom dwaj jubilejej: Před 50 lětami je so w telewizij prěni film z Olsenowej cwólbu pokazał - a před 20 lětami bu Olsenowa cwólba prěni raz w Budyskim dźiwadle zahrata.


Wjacore twarnišća we Łužicy

Puć wot křižowanišća pola Baćonja hač k S100 pola Libonja je wot wčerawšeho kompletnje začinjeny. Hač do 22. junija so tam hornja woršta asfalta ponowja a tež pobóčne bankety. Wobjězdki wjedu přez Chrósćicy a Bóšicy. W Sprjejcach so tohorunja wot wčerawšeho twari, tam je wokrjesna droha na Sydlišćowej hač do kónca nowembra zawrjena, dokelž so móst wuporjedźa. A wot jutřišeho je w Budyšinje wot křižowanišća při Serbskim ludowym ansamblu přez Móst měra hač ke kružnemu wobchadej jenož jedna jězdnja swobodna. Hač do kónca julija so tam dźěła - zdźěla puć kompletnje zašlahaja.


Kolesowarska šćežka nimale hotowa

Kolesowarska šćežka podłu B96 mjez Kamjenej pola Rakec a Stróžu je nimale dotwarjena. Planowany termin kónc apryla njeje so dodźeržeć móhł, dokelž su so w mjezyčasu přidatne wobšěrne archeologiske wurywanja na wjacorych stach metrach twarnišća přewjedli. Jeli so dźěła po planje přewjedu, so pućik za kolesowarjow srjedź junija wotewri.


Chróšćenjo so z Madźarskeje nawróćili

Čłonojo Chróšćanskeho pasionskeho towarstwa su sej kónc tydźenja předstajenje pasiona w madźarskim měsće němskeje mjeńšiny Budaörs wobhladali. Na mjezsobnej wuměnje "Europasio" z 43 dalšimi skupinami, kiž pasionsku hru předstaja, su nowe styki nawjazali a přichodne zetkanja planowali. Klětu je Europasio w Francoskej. Nimo toho wobhladachu sej łužiscy hrajerjo tež madźarski parlament w stolicy Budapest.

posledni raz aktualizowane: 05. smažnika 2018, 08:58 hodź.