Powěsće: štwórtk, 07.06.2018


Drježdźany: Z Piwarzom so zetkali

Serbskim požadarjam wo studij wučerstwa so maćernorěčny bonus wotnětka za wšě fachowe směry přiliči. To je w nowym wysokošulskim přizwolenskim zakonju zapisane a płaći za wšě Sakske uniwersity. Dotal mějachu tajki bonus jenož w Lipsku we zwisku z předmjetom serbšćina. Na to skedźbni sakski kultusowy minister Christian Piwarz wčera w Drježdźanach, na posedźenju Sakskeje Serbskeje rady. Zdobywanje serbskich wučerjow bě jedna z hłownych temow. - Dale witaše Serbska rada, zo so póndźelu w sakskim krajnym sejmje prěni raz w jeho stawiznach zjawne słyšenje k serbskim naležnosćam wotměje.


Slepo: Šulski centrum rosće

Byrnjež dźeń a ćešo było, twarske firmy namakać, běži twar Slepjanskeho Němsko-Serbskeho šulskeho centruma dotal nimale po planje. To zdźěli Steffen Seidlich wot Slepjanskeho zarjadniskeho zwjazka gmejnskej radźe. Za kóždy z wosom twarskich losow je znajmjeńša jedna twarska firma poskitk wotedała. Slepjanski šulski centrum budźe wosom hektarow wulki a płaći něhdźe 24 milionow eurow. Z nich přewozmje energijowy koncern LEAG něhdźe 15 milionow. Přepodać ma so wón klětu kónc lěta.


Berlin: Kónc brunicy rjadować

Zwjazkowy kabinet w Berlinje je wčera wuhlowu komisiju zwołał. Komisija ma kónc wudobywanja brunicy w Němskej a strukturnu změnu w dźensnišich rewěrach rjadować. Nimo Łužicy potrjechi to tež Srjedźnu Němsku a Sewjerorynsko-Westfalsku. Komisiju ma mjez druhim něhdyši Sakski ministerski prezident Stanisław Tilich nawjedować. Jemu poboku su něhdyši braniborski ministerski prezident Matthias Platzeck, šef železnicy Roland Pofalla a wědomostnica Barbara Praetorius. 27 dalšich čłonow komisiji přisłuša. Započnu hišće do lěćnych prózdninow dźěłać a chcedźa plan hač do kónc lěta předpołožić.


Trjebin: Zrěčenje bórze hotowe

Zakładne zrěčenje wo přesydlenju Miłoraza mjez gmejnu Trjebin a energijowym koncernom LEAG je mjenje bóle dojednane. Wo tym informowaše wjesnjanosta Waldemar Locke wčera na posedźenju gmejnskeje rady. Poslednje wotewrjene prašenja maja so hač do kónca junija dorěčeć, po tym zrěčenje gmejnskej radźe a zarjadam předpołožić. W nazymje chcedźa je podpisać. Na posedźenju pak so kritizowaše, zo su so ličby a fakty ze zrěčenja hižo w předpolu do zjawnosće dali. - Nimo toho Locke připowědźi, zo chce so Sakski ministerski prezident Michael Kretschmer w nazymje na zhromadnym posedźenju gmejnskeju radow Trjebina a Slepoho wobdźělić.


Łužica: Plany za druhe połlěto steja

Lětuša kubłanska jězba Kamjenskeje župy Michał Hórnik wjedźe lětsa w septembru do Namysłowa. Na to dorozumi so wčera župne předsydstwo na swojim posedźenju w Chrósćicach. Nimo toho chcedźa w nowembru župnu kermušu w Hórkach swjećić a hač do přichodneje hłowneje zhromadźizny dale wo pomjenowanju Serbski kraj diskutować. - Tohorunja wčera je so předsydstwo Budyskeje župy Jan Arnošt Smoler na kandidatow za Myto Domowiny a na program za dźeń wotewrjenych duri tutu sobotu w Njechornju dojednało.


Budyšin: Serbow wopytali

Na přeprošenje Goethoweho instituta z Berlina pobychu zastupjerjo němskich mjeńšin přewažnje z wuchodneje Europy wčera w Budyšinje. Skupina z wjac hač 20 ludźimi mjez druhim z Letiskeje, Rumunskeje, Kirgiziskeje, Pólskeje a Chorwatskeje přebywaše w běhu tydźenskeho projekta jedyn dźeń w Hornjej Łužicy. Wopytachu Rěčny centrum WITAJ, Serbski muzej a Domowinu, zo bychu Serbow zeznali. Na přikład jich medije zajimowachu - kotry wobjim maja a kak funguja, a su so tež za poćahom mjez Serbami a Němcami prašeli.

posledni raz aktualizowane: 07. smažnika 2018, 08:44 hodź.