Powěsće: pjatk, 08.06.2018


Hornja Łužica: Bórze móžemy dwurěčnje wolić

Při komunalnych wólbach w sakskim dwurěčnym teritoriju dóstanu wolerjo w přichodźe dwurěčne němsko-serbske wólbne podłožki. Z tym je so hižo jedne lěto stare žadanje sakskeje Serbskeje rady zwoprawdźiło. Wo tym informowaše w Drježdźanach Thomas Rechentin wot sakskeho ministerstwa za nutřkowne naležnosće serbsku radu. Potrjechi to wšitke podłožki za komunalne wólby, a to we wólbnym lokalu runje tak kaž při listowych wólbach. Při wólbje wyšeho měšćanosty Kamjenca lětsa 23.septembra maja so dwurěčne formulary prěni raz wužiwać.


Łužiska jězorina: Nowe hranicy wosrjedź Łužicy

Hranica mjez Sakskej a Braniborskej ma so w přichodnych lětach we Łužiskej jězorinje přesunyć. Kaž pisa nowina Lausitzer Rundschau, ma so wona mjez druhim wokoło Erikoweho, Lejnjanskeho a Parcowskeho jězora přiměrić. Hranica njeměła hižo přez jězory hić, město toho dyrbjeli jězory jednemu jeničkemu zwjazkowemu krajej přirjadowane być. To ma jich wobhospodarjenje zjednorić.


Pančicy: Nowa sirena je wótřiša

W Pančicach-Kukowje su při ponowjenju třěchi Šule Ćišinskeho tež nowu sirenu připrawili. Wona trjeba so lědma hladać a funguje tež bjez miliny, informowaše wjesnjanosta Markus Kreuz wčera gmejnsku radu. Nimo toho je nowa sirena wótřiša hač dotalna. Gmejna dyrbješe za nju 2.500 eurow připłaćić. Samsny model chcedźa nětko tež w Kukowje a we Wotrowje instalować.


Slepo a Trjebin dźeń a mjeńšej

Wokoło Slepoho a Trjebina bydli přeco mjenje ludźi. Tak je so ličba wobydlerjow w Slepjanskej wosadźe loni wo 75 na nětko 4.650 pomjeńšiła. W Trjebinje samym bydli nětko hišće 920 ludźi - 15 mjenje hač lěto do toho. Jeničce w bliskim Dźěwinje bydli zaso snadnje wjac ludźi. To zdźěli so wčera Dźěwinskej gmejnskej radźe (němsce: Großdüben). Rozdźělne wuwiće zwisuje po měnjenju komornicy wosebje z přichodom brunicowych jamow we wokolinje.


Trjebink: 230 podpismow

230 wobydlerjow Trjebinka je swojemu wjesnjanosće zjawny list přepodało. W nim sej wot Sakskeje, wot Zwjazka a wot koncerna LEAG žadaja, zo jich runohódnje druhim wobydlerjam Trjebina z internetom, ćopłotu a płunom zastaraja. Wjele lět njeje so do Trjebinka hižo inwestowało, dokelž dyrbješe so tutón wjesny dźěl Trjebina wotbagrować. Loni pak koncern LEAG swoje plany změni a Trjebink móže dale wobstać. Wochožanska wuhlowa jama je so mjeztym na 1.600 metrow wjesce zbližiła.


Serbske koparki nimale top!

Koparki 5. a 6. lětnika Budyskeho serbskeho gymnazija su sej w Lipsku slěbro wudobyli. Běše to w sakskim finalu šulskeho wubědźowanja Młodźina trenuje za olympiju. Přećiwo gymnazijej z Drježdźan wone z 5:2 dobychu, přećiwo pozdźišemu dobyćerskemu gymnazijej z Borny pak 1:2 podležachu. Wobdźělili pak běchu so jenož tři mustwa. Kapitanka Serbskeho gymnazija bě Xenia Koberec ze Sernjan, najwjac wrotow serbskich gymnaziastkow třěli Lejna Handrikec z Dobrošic.

posledni raz aktualizowane: 08. smažnika 2018, 09:30 hodź.