Powěsće: srjedu, 13.06.2018


Budyski wokrjes: Wjacore wsy bjez miliny

Něhdźe 2000 domjacnosćow - mjez Kamjencom, Pančicami-Kukowom a Ralbicami bě wčera rano wot 6.40 hodź. bjez miliny. Kaž zdźěli nowinska rěčnica energijoweho zastaraćela ENSO, bě zestarjeny podzemski kabl mjez Kamjencom a Ralbicami wina na tym. W běhu hodźiny pak mějachu problem wotstronjeny, posledni běchu 8.40 hodź. zaso přizamknjeni. Z přičinu wupada so přistajeni ENSO dale zaběraja a hakle potom so reparatura wotzamknje.


Radwor: WITAJ-skupina najskerje wuchowana

Radworska pěstowarnja Dźěłaćerskeho dobroćelskeho skutka AWO „Marja Kubašec" ma wuhlady na nowu serbsku maćernorěčnu kubłarku. To zdźěli wjesnjanosta Radworskeje gmejny Wincenc Baberška wčera po posedźenju gmejnskeje rady. Dotal bě dalewobstaće tamnišeje WITAJ-skupiny wohrožene, dokelž bě dotalny kubłar wupowědźił. Wjesnjanosta pak wuzběhnje, kak wažne je wobstaće serbskorěčneje skupiny, wosebje w zwisku z Radworskej šulu. Wot awgusta chcedźa nowu maćernorěčnu kubłarku w Radworju witać, tak Baberška.


Malešecy: Chce wjace hač poł miliona inwestować

Hospodarski plan gmejny Malešecy za lětsa wopřija 7,5 milionow eurow, z toho wostanje 700.000 za inwesticije. Wjace hač połojcu inwesticiskeje sumy zasadźa za wutwar drohi w Brězynce. Wčera je gmejnska rada budget wobzamknyła - z jeničkim hłosom, z tym wjesnjanosty. Wšitcy gmejnscy radźićeljo so hłosa wzdachu. Z tym chcychu přećiwo financnej politice Sakskeje protestować. Pawšalnu jónkrótnu přiražku stata za kóždu gmejnu we wysokosći 70.000 eurow trjebaja Malešecy za narunanje běžnych kóštow.


Hamorska gmejna a koncept za Bjerwałdski jězor

Hamorska gmejna je mjeztym hižo lěta dołho při tym, strukturny koncept za turizm při Bjerwałdskim jězorje wutwarić a přesadźić. Zakład za to rěkaše 2004 "krajinowy park Bjerwałdski jězor". Hač do lěta 2025 chcedźa projekt zwoprawdźić. Tak chcedźa so wo to prócować pasažěrowe łódźnistwo nastorčić, štož so dotal hišće šlachćiło njeje. Tež zastaranje a přistawne městna za čołmy měli so při zapadnym přibrjohu hišće stworić. Při inwesticijach měli so tež priwatnicy witać, tak rěkaše na zašłym posedźenju Hamorskeje gmejnskeje rady.


Rakecy: LEADER-horncy pjelnjene

Tež lětsa steja znowa spěchowanja we wysokosći 2,3 miliony eurow za wuwiće wjesnych kónčin w LEADER-regionje Hornjołužiska hola a haty k dispoziciji. Požadać smědźa so wosoby, předewzaća, komuny a njepřemysłowe organizacije kaž towarstwa a cyrkwje. Hižo k 10. razej so we wobłuku spěchowanskeje periody 2014-2020 namołwja, próstwy na regionalny běrow w Rakecach zapodać. Posledni termin za to je lětsa 17. awgust.

posledni raz aktualizowane: 13. smažnika 2018, 10:10 hodź.