Powěsće: wutoru, 03.07.2018


Róžant: Při najrjeńšim wjedrje putnikowali

Wčera je po tradiciji na Marije domawopytanja sta serbskich katólskich wěriwych do Róžanta putnikowało. Hłowny celebrant božeje mšě bě Chróšćanski wosadny farar Měrćin Delenk, prědował je farar Michał Anders. Hudźbnje wobhrubiła bě kemše młodźinska spěwna skupina. Jutře putnikuja potom dźěći w zwisku z nabožnym tydźenjom k Róžeńčanskej swjatnicy.


Chorwatska: Přezpólni Serbow zastupowali

8 spěwarjow a třo hercy spěwneje skupiny "Přezpólni" je so w nocy z Chorwatskeho Daruvara nawróćiło. Jako delegaća Domowiny zastupowachu Serbow pola tamnišeje čěskeje mjeńšiny. Sobotu wječor wobohaćichu "Čěske dny" w susodnej wsy Dolanach. Njedźelu mějachu wjacore wustupy na wšelakich městnosćach w Daruvaru. Hłowny program wotmě so při tamnišim hrodźe. Wčera załožichu po puću dom hišće w Dolních Bojanovicach, hdźež zetkachu so z někotrymi dołholětnymi přećelemi Serbow.


Hornja Łužica: Baćony woznamjenili

W Hornjej Łužicy su w zašłych dnjach młode baćony z rynkami markěrowali. Akciju přewjedźe kóžde lěto w lěću přirodoškitna stacija wuchodna Hornja Łužica zhromadnje z ptačkowej přirodoškitnej staciju. Wčera su mjez druhim w serbskich wsach kaž Komorowje, Konjecach a Ralbicach 41 młodźatow w 15 hnězdach nadešli. Hačrunjež je to lětsa zwjeselaca bilanca, ličba baćonjow w Hornjej Łužicu dale spaduje. Přičiny za to su mnohostronske, tak ornitologa Steffen Siegel. Na přikład njenamakaja moderneho ratarstwa a wulkich płoninow rěpika a kukuricy dla dosć picy a z tym njemóža młodźata dosć derje zastarać.


Choćebuz: Witaj-camp wućeženy

Za Witaj-camp delnjołužiskeje wotnožki Rěčneho centruma w Choćebuzu je so 19 dźěći a młodostnych přizjewiło. Prózdninske lěhwo, kotrež wotměje so srjedź julija w Jarješku, je z tym wuknihowane. Při tym maja dwě skupinje, dźělenej po rěčnych znajomosćach. Poprawom wotběži wšitko serbsce, dźěći pak móža tež němsce wotmołwić, tak nawoda RCW w Choćebuzu Viktor Zakar.


Hórki: Satkula w pěsku wuspěšna

Wčera wječor zetkachu so serbscy sportowcy na druhej staciji Satkula beachvolleybuloweje tury w Hórkach. Njedaloko sportnišća, při pěskowym hrajnišću su wjesnjenjo ławki zestajeli a so wo čělne derjeměće starali. Dohromady jědnaće mustwow je do Hórkow přijěło, wječor dźesaćich, po štyrjoch hodźinach hraća rěkaše dobyćer wčera k prěnjemu razej "Radijo Satkula" - kiž njeje dotal hišće ženje na beachturje dobyło.

posledni raz aktualizowane: 03. pražnika 2018, 08:08 hodź.