Powěsće: štwórtk, 05.07.2018


Budyšin: Rozmołwa ze Serbami

Někak 120 zajimowanych Serbow je poskitk Sakskeho ministerskeho prezidenta, Michaela Kretschmera, a dalšich zastupjerjow knježerstwa přiwzało, w rozmołwach swoje starosće, prašenja a kritiku wuprajić. Prawidłowne zarjadowanje "Rozmołwa ze Sakskami" wotmě so tón króć, na přeprošenje předsydy Domowiny, Dawida Statnika, w Serbskim domje w Budyšinje. Hłowne temy, kotrež so narěčachu, běchu mjez druhim: falowacy serbscy wučerjo, kubłanje w serbskich pěstowarnjach a žłobikach a falowacy serbskorěčny personal w starownjach. Tež wjelk a serbskim sejm běštej horco diskutowanej temje.


Slepo: twarske ležownosće za młode swójby

Gmejna Slepo chce poprawom za wutwar spěšneho interneta zaplanowane pjenjezy za hinaše zaměry wudawać. Wutwar spěšneho interneta zapłaćitej wot lětušeho dźě dospołnje zwjazk a kraj Sakska. Tak je gmejnska rada tutón tydźeń rozsudźiła, zo chce z wyšacych pjenjez wjacore ratarske a lěsne ležownosće kupić a je na twarske ležownosće za młode swójby přeměnić. Nimo toho chce z pjenjez swójski podźěl na přetwarje Mułkečanskeho kěrchowa zapłaćić. 71.000 eurow drohi projekt pak ma so jenož zwoprawdźić, jeli so z programa ILE spěchuje.


Lubnjow: swjedźeń z wulkim serbskim podźělom

W Lubnjowje zahaji so dźensa wječor Błótowski a třělcowski swjedźeń. Na šěsć městnach po cyłym měsće maja tam hač do njedźele kulturne, rjemjeslniske a zabawne poskitki. Na jewišću w hrodowym parku wěnuja so sobotu serbskej kulturje. Mjez druhim wustupja tam dujerska kapała Horjany, skupina Kula Bula, Němsko-serbski ansambl Choćebuz, rejwanska skupina z Ćiska a Dešnjanska młodźina.


Šwica: žónska koparska wubranka na turněr

Dźensa poda so Serbska žónska koparska wubranka k přećelskemu turněrej do Šwicarskeje gmejny Laax. Tamniša mjeńšina Retoromanow je serbski cyłk na turněr přeprosyła, kiž so jutře (pjatk) a sobotu přewjedźe. Jutře wječor změja potom zhromadne zetkanje a wuměnu. Dohromady poda so delegacija 21 wosobow z Łužicy do Šwicarskeje, njedźelu so nawróća.


Berlin: Wo delnjoserbskej basnicy Minje Witkojc

Dr. Viktor Zakar je wčera w Berlinje wo zwiskach Delnjoserbow do Juhosłowjanskeje na přikładźe listowanja basnicy Miny Witkojc přednošował. Wón bě jedyn z dźesać rěčnikow na wědomostnej konferency wo kulturelnych stykach Srjedźneje Europy a Balkana w prěnjej połojcy 20. lětstotka. Konferencu wuhotowaštej Makedonska akademija wědomosćow a wuměłstwa a Berlinske Leibnizowe zhromadźenstwo za wědomosće. Bě to štwórta tajka zhromadna konferenca.


Kopańca: Serbskaj sudnikaj zasadźenaj

Lea Krječmarjec z Wulkeho Wjelkowa budźe w nowej koparskej dobje jako sudniča w regionalnej lize žonow a w krajnej klasy muži zasadźena. To je Zapadołužiski koparski zwjazk zdźělił. 16-lětna šulerka Serbskeho gymnazija Budyšin je wšitke testy wobstała. Nětko smě wona w třećej najwyšej koparskej lize žonow Němskeje sudźić. Serbski referej Michał Neter z Njeswačidła pak bu jako asistent za zwjazkowu koparsku ligu młodźiny A nominowany.

posledni raz aktualizowane: 05. pražnika 2018, 08:23 hodź.