Powěsće: póndźelu, 09.07.2018


Budyšin: atraktiwne město

W zašłych pjeć lětach je 11.400 wosobow do Budyšina přićahnyło. To je 750 wjace hač je Sprjewine město wopušćiło, zdźěli měšćanske zarjadnistwo. Předewšěm młodostni w starobje mjez 15 a 27 lětami a ludźo nad 50 su přiběrajcy do města přišli. Tež wokolne gmejny su za młode swójby atraktiwne, štož so we wobydlerskej statistice špiheluje. Wučomnikow ćehnje za wukubłanske lěta zwjetša do Drježdźan.


Kopańca: Žónska wubranka zaso doma

Serbska koparska wubranka žonow je so wčera wječor ze Šwicarskeje nawróčiła. Na přeprošenje towarstwa Retoromanskeje mjeńšiny „CulturaBallapeRumantsch" pobychu na štyridnjowskim zetkanju w gmejnje Laax. Dwě hrě tam mějachu - duel přećiwo Retoromankam skónči so z 5:0 za łužiskich koparkow. Za Serbowki běše to zdobom treningowe lěhwo, tak mustwowy nawoda Handrij Rachela, kiž dyrbješe tež dwě zraneni registrować. Nětko přihotuja so koparki na přichodnu Europeadu za dwě lěće.


Certifikat: Budyska chorownja wuznamjenjena

Klinika za dźěćacu medicinu Budyskeje chorownje bu k pjatemu razej jako wuběrna klinika za dźěći a młodostnych wuznamjenjena. Z tym móža Hornjołužiske kliniki na dalšej lěće z wotpowědnym znamješkom kwality za sebje wabić. Certifikat wobswědči chorowni wysoki niwow stacionarneho zastaranja chorych, dźěći a młodostnych. Tutón so wot 2009 po cyłej Němskej wot wjacorych fachowych a staršiskich towaršnosćow zhromadnje spožči.


Mužakow: Nowa turistika informacija dróša hač planowana

Nowa turistiska informacija při zachodźe Pückleroweho parka w Mužakowje so spočatk septembra składnostnje hortensijoweho swjedźenja wotewri. Tuchwilu rjemjeslnicy w njej hišće moluja a špundowanje a roły kładu. Poprawom měła informacija hižo wot lońšeho adwenta wotewrjena być. Tola zestarjena twarska substanca chěže, do kotrejež informacija poćehnje, wobradźeše při ponowjenju problemy. Přetwar so tohodla wo 75.000 eurow podróši. Cyłkownje płaći nowa turistiska informacija něhdźe 400.000 eurow.


Sport: Serbska dwójka podležała

Christian Zimmermann a Dave Langa staj sobotu we Worklecach 4. Captainscup dobyłoj. Bičowolejbulistaj z Drježdźan přesadźištaj so w kónčnej hrě přećiwo serbskej dwójce Clemens Eckert a Ludwig Eckert. Wobdźěliło bě so dohromady 10 porikow. Tradicionelny woljebulowy turněr na trawniku su sportowcy Viktorije Worklecy, kiž běchu turněr priwatnje zarjadowali a wuhotowali, do toho wotprajili, dokelž bě so pře mało mustwow přizjewiło.

posledni raz aktualizowane: 09. pražnika 2018, 08:02 hodź.