Powěsće: srjedu, 11.07.2018


Worklecy: Spěchowanje za hort

Worklečanska gmejna dóstanje wot Sakskeho ministerstwa za wobswět a ratarstwo spěchowanje 1,4 miliony eurow za nowy hort, kiž měł na šulskim terenje nastać. K tomu wjesnjanosta Franc Brusk: "Naš hort nam rumnosće bjerje, kiž su nuznje trěbne za šulsku wučbu. Dla toho smy my so masiwnje wo tute srědki prócowali. Tež starši sebi to přeja, dokelž mamy my na našim terenje šule ćěłozwučowarnju, mamy sportnišćo a hrajkanišćo. A tute puće, kiž so w šuli wotměja, na přikład za cyłodnjowske poskitki, su krótke a njenastanu žane transporty z abo do susodnych wjeskow." Gmejna sama dyrbi 25 procentow pjenjez přinošować - z pomocu likwidnych pjenjez a kredita. W septembrje 2020 měło nowe twarjenje za 120 dźěći stać. Cyłkowny projekt płaći nimale dwě milionje eurow.


Demografija: Zhorjelski wokrjes zestarja

Zhorjelski wokrjes je jedna z třoch kónčinow Sakskeje, w kotrejž póńdźe w přichodnych lětach nadpřerěznje wjele ludźi do renty. Z tym je tež wokolina mjez Niskej, Slepom a Mužakowom potrjechena. Młodostni, kotřiž porno tomu dźěłać započnu, njebudu pobrachowace dźěłowe mocy narunać móc. To zdźěli wčera Sakska agentura za dźěło. Po jeje měnjenju stej dwaj wupućej z bližaceje so mizery: masiwne wabjenje dźěłaćerjow w Pólskej a Čěskej kaž tež wabjenje něhdyšich wobydlerjow, kotřiž bydla tuchwilu zwonka Łužicy.


Mały Wjelkow: Maja hižo tójšto wopytowarjow

Najebać zwyšenych płaćiznow za zastup je sawrijowy park w Małym Wjelkowje lětsa hižo wjace hač 100.000 ludźi wopytało. Kaž zdźěli nošer parka, je to nimale runje telko kaž loni. Nimo toho poskićuje so wot lětušeho tež busowa linija, kotraž wjace króć wob tydźeń při arealu pozastawa. Loni je Małowjelkowski park sawrijow 235.000 ludźi wopytało.


Hózk: Lětsa bjez ewenta

W Hózku so lětsa žadyn Black Bird Run njepřewjedźe. Kaž zamołwići zdźěla, njejsu so zahe dosć wo organizaciju postarali. Prěni króć je so wubědźowanje w lěće 2015 přewjedło. Po tym witachu tam lěto wob lěto wjace wobdźělnikow, loni bě jich wjac hač 230. Při sportowym wubědźowanju hinašeho razu dyrbja młodostni w błóće łazyć, do rěki skakać a hišće druhe zadźěwki zmištrować. Po woli Hózkowskeje młodźiny pak měło so wubědźowanje klětu spočatk septembra zaso wotměć.


Čorny Chołmc: Nowy poskitk

W Krabatowym młynje w Čornym Chołmcu maja wot nětka awdijoguide. Po Krabatowych hrach hodźa so dohromady 15 eksemplarow za wjedźenja wupožčić - nimo němčiny, jendźelšćiny a čěšćiny poskići so tež serbšćina. Kulturne spěchowanje Budyskeho wokrjesa je poskitk mjez druhim zrealizowało.

posledni raz aktualizowane: 11. pražnika 2018, 08:57 hodź.