Powěsće: štwórtk, 12.07.2018


Nowe městno za Schadźowanku

Lětuša 144. Schadźowanka wotměje so w Němsko-Serbskim ludowym dźiwadle Budyšin. Kaž zdźěli Jana Pětrowa wot Załožby za serbski lud, su so zamołwići wčera na to dojednali. Program přewjedu na hłownym jewišću, wječorna zabawa po oficialnym dźělu budźe potom w foyejach dźiwadła. Režiju přewzataj znowa Jakub Wowčer a Maksimilian Kral. Hornjoserbska schadźowanka wotměje so 24. nowembra.


Zhromadne dźěło na dobro wšěch

Župa "Jan Skala" - zwjazk serbskich studowacych - je so w tutym tydźenju w Lipsku z přichodnymi projektami zaběrała. Studentski chór nawjeduje lětsa Michał Dónat, dokelž póńdźe dotalny dirigent Syman Hejduška na lěto do wukraja. Dale chcedźa sej studenća do Prahi wulećeć a so z Towarstwom přećelow Serbow zetkać. Nimo toho chcedźa Lipšćanscy a Drježdźanscy studenća w přichodźe wušo hromadźe dźěłać. Wosebje Drježdźanske towarstwo Bjarnat Krawc so tuchwilu bědźi, zo by dorost zdobyło. W tamnišim serbskim internaće je jenož połojca bydlenjow ze serbskimi studentami wobsadźena. W Lipšćanskej Sorabiji so porno tomu dźeń a wjace studentow na towarstwowym žiwjenju wobdźěli. Župa přemysluje hižo, wabjenske lětaki za internataj w Drježdźanach a Lipsku naćisnyć, zo bychu přichodnych serbskich studentow přiwabili.


Nakromne kónčiny njezabyć

W nakromnych kónčinach Budyskeho wokrjesa matej so serbska rěč a kultura dale wobstajnje spěchować. K tomu maja so tam bydlacy Serbja ze zarjadowanjomaj w Barće a Hodźiju podpěrać. To je sej předsydstwo župy "Jan Arnošt Smoler" wčera, wobjednawši klětuše plany, předewzało. Na dnju wotewrjeneho pomnika budźe dom Měrćina Nowaka-Njechorńskeho znowa wočinjeny, štož zwjaza so z turu hornjołužiskeho wuměłstwoweho busa. Dotal jara wuspěšny projekt ze šulerjemi 4. lětnikow, kotřiž serbsce wuknu, so tohorunja klětu w Budyšinje dale powjedźe. Při tym sej šulerjo serbske městnosće z rallyju wotkryja.


Wojuja přećiwo lichowanju

Wupowědźenje premijowych lutowanskich zrěčenjow (němsce: Prämiensparvertrag) Budyskeje nalutowarnje tudyšu centralu za škit konsumentow lětsa wosebje zaběra. To wuńdźe z jeje wčera předstajeneje bilancy. Dotal pak njemóža tam hišće rjec, hač so rozkora za lutowarjow abo nalutowarnju derje skónči. Dalše temy, z kotrymiž so centrala za škit konsumentow (němsce: Verbraucherzentrale) loni a lětsa husto zaběraše, běchu njewoprawnjene abo přewysoke zličbowanki a lichowanje při płaćiznach někotrych klučowych serwisow.


Lětsa tež Serbja na jewišću

K prěnjemu razej změje gig-festiwal w Róžeńće lětsa tež serbski podźěl na jewišću. Tak su sej organizatorojo skupinu Sorbian Art Trio přeprosyli. Dalša planowana skupina JANKAHANKA pak dyrbješe wosobinskich přičin dla wotprajić. Lětsa wustupja mjez druhim tež wuměłcy z Ameriki, Irskeje a Pólskeje. Gig-festiwal wotměje so wot 27. do 29. julija - mjeztym hižo třeći raz na putniskej łuce w Róžeńće.

posledni raz aktualizowane: 12. pražnika 2018, 09:05 hodź.